ەريەۆاندا گرەك-ريم جانە ەركىن كۇرەستەن وتكەن 37ء-شى الەم بىرىنشىلىگىندە ارميا سپورتشىلارى ءۇش التىن جانە ءتورت قولا ەنشىلەدى.
جەڭىمپازدار مەن جۇلدەگەرلەردى ارميا ورتالىق سپورت كلۋبىنىڭ باسشىلىعى، اسكەري قىزمەتشىلەر مەن تۋعان-تۋىستارى كۇتىپ الدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
ارمەنيا استاناسىندا گرەك-ريم جانە ەركىن كۇرەستەن وتكەن CISM الەم چەمپيوناتىنا الەمنىڭ 24 ەلىنەن 400 سپورتشى جينالدى. قازاقستان ارميا ورتالىق سپورت كلۋبىنىڭ اتىنان چەمپيوناتقا 17 اسكەر بالۋانى شىقتى.
جەكپە-جەكتىڭ ناتيجەلەرى بويىنشا ەركىن كۇرەس شەبەرلەرى، ق ر قارۋلى كۇشتەرىنىڭ قىزمەتكەرى كاميل كۋرۋگلييەۆ (97 كەلى) جانە ەفرەيتور مەيىرجان ءاشىروۆ (70 كەلى) تۇعىردىڭ ەڭ جوعارعى ساتىسىنان كورىنىپ، چەمپيون اتاندى. 130 كەلى سالماقتا گرەك-ريم ستيلىندە كۇرەسكەن سپورتشى ەفرەيتور ءالىمحان سىزدىقوۆقا قارسىلاس شاق كەلمەدى.
– قارسىلاستار مىقتى بولدى، جاقسى دايىندالعاندارى كورىنىپ تۇر. الەمدىك ارەنادا ەل نامىسىن ابىرويمەن قورعاعانىما قۋانىشتىمىن. تىنىمسىز جاتتىعۋلاردىڭ ناتيجەسى دە جاقسى بولدى. ءبىزدى قولداعانداردىڭ بارلىعىنا العىس ايتامىن، – دەدى چەمپيون مەيىرجان ءاشىروۆ.
بىرىنشىلىكتىڭ قورىتىندىسى بويىنشا گرەك-ريم ستيلىندەگى بالۋان كىشى سەرجانت ايدوس سۇلتانعالي (60 كەلى) جانە ق ر قارۋلى كۇشتەرىنىڭ قىزمەتكەرى رۇستەم مىرزاعالييەۆ (86 كەلى) قولا مەدالدارعا يە بولدى. ايەلدەر كۇرەسىندە ءۇشىنشى ورىن ق ر قارۋلى كۇشتەرىنىڭ قىزمەتكەرلەرى سۆەتلانا انكيچيەۆا (50 كەلى) جانە مارينا سەدنيەۆا (55 كەلى) يەلەندى.
– سپورتشىلارىمىزدىڭ جەڭىسى مەملەكەتتىك تۋدىڭ كوتەرىلىپ، قازاقستان ءانۇرانى ورىندالعان كەزدە ەرەكشە سەزىلەدى ەكەن. ءبىز ءۇشىن بۇل ءسات تەبىرەنەرلىك ماقتانىشقا تولى بولدى. چەمپيوندارىمىزعا زور ەڭبەگى، ەرىك-جىگەرى مەن باتىلدىعى ءۇشىن راحمەت ايتامىن، – دەدى قورعانىس مينيسترلىگى اوسك (الماتى فيليالى) – سپورت كوميتەتى وقۋ-جاتتىعۋ ورتالىعىنىڭ باستىعى مايور بەردەن اقپانبەكوۆ.