جىل باسىنان بەرى زياندى ەڭبەك جاعدايىندا جۇمىس ىستەيتىن 8،7 مىڭنان استام قىزمەتكەرگە ساقتاندىرۋ ۇيىمدارىنان 2 ملرد تەڭگەگە جۋىق ارنايى الەۋمەتتىك تولەمدەر تولەندى.
بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ماريا حادجييەۆا ايتىپ بەردى، دەپ حابارلايدى aqshamnews.kz.
سپيكەردىڭ سوزىنشە، ءومىردى ساقتاندىرۋ سالاسى ازاماتتارىمىزدىڭ ەرەكشە ساناتتارىن ساقتاندىرۋ ارقىلى قورعاۋدى قامتاماسىز ەتۋ جونىندە ماڭىزدى الەۋمەتتىك فۋنكسيانى ورىندايدى.
«مەملەكەت باسشىسىنىڭ تاپسىرماسىن ىسكە اسىرۋ ءۇشىن 2023 جىلعى جەلتوقساندا زاڭ قابىلداندى، وندا ساقتاندىرۋ ۇيىمدارى ەسەبىنەن زياندى ەڭبەك جاعدايلارىندا جۇمىس ىستەيتىن 55 جاسقا تولعان قىزمەتكەرلەرگە جاڭا الەۋمەتتىك تولەمدەردى جۇزەگە اسىرۋ كوزدەلگەن. تولەمدەر قىزمەتكەردى جازاتايىم وقيعالاردان مىندەتتى ساقتاندىرۋ ارقىلى جۇزەگە اسىرىلادى»، - دەدى ول ورتالىق كوممۋنيكاسيالار قىزمەتىندە وتكەن بريفينگىدە.
بيىلعى جىلدىڭ 9 ايىندا 8،7 مىڭنان استام قىزمەتكەرگە ساقتاندىرۋ ۇيىمدارىنان 2 ملرد تەڭگەگە جۋىق ارنايى الەۋمەتتىك تولەمدەر تولەندى. وعان قوسىمشا بولاشاق تولەمدەر ءۇشىن 19،7 ملرد تەڭگەگە رەزەرۆتەر قالىپتاستىرىلدى.
بۇل تولەمدەردەن باسقا 2024 جىلعى 1 قاڭتاردان باستاپ، جازاتايىم وقيعالاردان مىندەتتى ساقتاندىرۋ شەڭبەرىندە الدىن الۋ جانە وڭالتۋ شارالارىنا تولەمدەر ەنگىزىلدى.
«الدىن الۋ شارالارىنا ارنالعان تولەمدەر جۇمىس بەرۋشىلەرگە ەڭبەك قاۋىپسىزدىگىن ارتتىرۋ ءۇشىن جۇزەگە اسىرىلادى، ال وڭالتۋ شارالارىنا تولەمدەر زارداپ شەككەن قىزمەتكەردىڭ دەنساۋلىعىن قالپىنا كەلتىرۋگە جۇمسالاتىن شىعىنداردى وتەۋگە ارنالعان. اتالعان شارالار وندىرىستە زارداپ شەككەن جانە زياندى ەڭبەك جاعدايلارىندا جۇمىس ىستەيتىن قىزمەتكەرلەردى الەۋمەتتىك قورعاۋدى كۇشەيتۋگە باعىتتالعان»، - دەدى م. حادجييەۆا.
ايتا كەتەيىك، تولەم زەينەتكەرلىك جاسقا تولعانشا عانا تولەنەدى. ويتكەنى زەينەتاقى تاعايىندالعاننان كەيىن ولار توقتاتىلادى.