14 ناۋرىز – جاڭعىرۋ مەن تاتۋلىق، قوناقجايلىق پەن ادامدار اراسىنداعى جاقىندىقتى بەينەلەيتىن كورىسۋ كۇنىنە وراي Almaty Tourism Bureau قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ شەكارا باقىلاۋ دەپارتامەنتىمەن جانە الماتى حالىقارالىق اۋەجايىمەن بىرلەسىپ، شەتەلدىك قوناقتار ءۇشىن اكسيا ۇيىمداستىرادى. ءىس-شارانىڭ ماقساتى – مەرەكەلىك اتموسفەرا قالىپتاستىرىپ، قازاق مادەنيەتىنىڭ نەگىزگى ەرەكشەلىكتەرىنىڭ ءبىرى، قوناقجايلىعىن كورسەتۋ، دەپ حابارلايدى aqshamnews.kz
كورىسۋ كۇنى ءداستۇرى اۋىزبىرشىلىك، سىيلاستىق جانە باسقوسۋ قۋانىشىنا نەگىزدەلەدى. ءدال بۇل كۇنى الماتىعا كەلگەن جولاۋشىلار بۇل جىلۋدى سەزىنە الادى. ءتولقۇجات باقىلاۋىنان ءوتۋ كەزىندە ولارعا قالانى ارالاۋعا ىڭعايلى بولاتىن گيد سىيلانادى. بۇل گيد الماتىنىڭ باستى كورىكتى جەرلەرىن تانىستىرادى. تۋريستەر كورگەن جەرىن بەلگىلەي الادى. بۇل – جاي عانا ەستەلىك سىيلىق ەمەس، قالانىڭ نەگىزگى كورنەكتى ورىندارى، مادەني نىساندارى مەن ەرەكشە داستۇرلەرىن قامتيتىن دايىن مارشرۋت. سونىمەن قاتار، وندا كولىك باعىتتارى مەن سەرۆيس قىزمەتتەرى تۋرالى اقپارات بەرىلگەن، بۇل قوناقتارعا قالا ىشىندە جايلى ءارى وڭاي ءجۇرىپ-تۇرۋىنا كومەكتەسەدى.
اكسيا 50-دەن اسا حالىقارالىق رەيسپەن كەلەتىن 5 مىڭنان اسا جولاۋشىنى قامتيدى. الماتىعا كەلگەن قوناقتار ۇشاقتان تۇسە سالا قالانىڭ قوناقجاي اتموسفەرانى سەزىنە الادى.
بۇل باستاما – تۋريستىك قىزمەت ساپاسىن ارتتىرۋعا باعىتتالعان «Best City Experience» باعدارلاماسىنىڭ ءبىر بولىگى. الماتى زاماناۋي، قوناقجاي جانە مادەني باي قالا رەتىندە وڭ يميدج قالىپتاستىرىپ كەلەدى. Mastercard مالىمەتتەرىنە سايكەس، جوعارى دەڭگەيدەگى سەرۆيس پەن ەرەكشە اسەرلەر تۋريستەردىڭ قايتا كەلۋ كورسەتكىشىن ارتتىرادى. مىسالى، 2024 جىلى ولاردىڭ ۇلەسى 25%-عا جەتتى.
تۋريستىك تاجىريبەنى جاقسارتۋدا شەكارالىق جانە كەدەندىك باقىلاۋ قىزمەتكەرلەرىنىڭ بىلىكتىلىگىن ارتتىرۋ ماڭىزدى ءرول اتقارادى. قوناقجايلىق بويىنشا تۇراقتى فاسيليتاسيالىق سەسسيالار ولاردىڭ حالىقارالىق جولاۋشىلارمەن قارىم-قاتىناس جاساۋ داعدىلارىن جەتىلدىرۋگە كومەكتەسەدى، بۇل ءوز كەزەگىندە تۋريستەرگە ىڭعايلى ورتا قالىپتاستىرادى.
Tourism Insights (Mastercard) دەرەكتەرىنە سايكەس، الماتى قازاقستانداعى تۋريستىك باعىتتار اراسىندا كوش باستاپ تۇر، ورتالىق ازيا بويىنشا تۋريستىك سۇرانىستىڭ 29،7%-ىن يەلەندى. قالاعا اۋە رەيستەرىنىڭ سانى ءداستۇرلى اۋە كومپانيالارىندا – 24،7%-عا، ال لوۋكوستەرلەردە – 44،5%-عا ءوستى. سونداي-اق، قايتا كەلۋشىلەر سانى 78،6%-عا ارتقان، ال بيلەت ىزدەۋ مەرزىمى 40 كۇنگە دەيىن ۇزاردى. اسىرەسە، جۇڭگو مەن تۇركيادان برونداۋ كورسەتكىشى ءوسىپ، الماتىنىڭ حالىقارالىق ارەناداعى تارتىمدىلىعى ارتىپ كەلەدى.
كورىسۋ كۇنى – بۇل دوستىقتىڭ، اۋىزبىرشىلىك پەن قازاقستانعا كەلگەن ءاربىر ادامعا دەگەن جىلى قارىم-قاتىناستىڭ سيمۆولى. قول الىسىپ، ىزگى تىلەك ايتۋ ءداستۇرى ادامدار اراسىنداعى بايلانىستى نىعايتادى. وسى مەرەكەگە ارنالعان اكسيا ەجەلگى داستۇرلەردىڭ ماڭىزدىلىعىن كورسەتىپ قانا قويماي، ەلدەگى تۋريستىك سالانىڭ دامۋىنا دا ۇلەس قوسادى.