بۇگىن قازاق تىلىندە العاش رەت جازىلعان «جاساندى ينتەللەكت الىپپەسى» كىتابىنىڭ تۇساۋكەسەر سالتاناتى ءوتتى، – دەپ حابارلايدى alqshamnews.kz.
شاراعا زيالى قاۋىم وكىلدەرى، باسپا ءىسى مەن قازاق ءتىلىنىڭ جاناشىرلارى، جۋرناليستەر جانە جاستار قاتىستى. Smart Point-تا ينە شانشار جەر بولمادى – ورىن جەتپەگەندەر تۇرەگەپ تۇرىپ، ەلىمىز ءۇشىن ماڭىزدى تۋىندىنىڭ تانىستىرىلىمىن تاماشالادى.
كىتاپ اۆتورى – جي سالاسىن بىرنەشە جىلدان بەرى زەرتتەپ كەلە جاتقان بىلىكتى مامان مەيىرجان اۋەلحان ۇلى. ول جينالعان قاۋىمعا كىتاپتى جازۋعا نە تۇرتكى بولعانى، قانداي قيىندىقتارعا تاپ بولعانى تۋرالى باياندادى. تۇساۋكەسەردەن كەيىن اۆتور وقىرمانداردىڭ سۇراقتارىنا جاۋاپ بەردى. سۇراقتار ۇلتتىق جانە اقپاراتتىق قاۋىپسىزدىك، وتاندىق جي الەۋەتى، كىتاپ جازۋ ءۇردىسى، سونداي-اق جي سالاسىنداعى تاۋەكەلدەر مەن مۇمكىندىكتەر سەكىلدى ءتۇرلى تاقىرىپتاردى قامتىدى.
كىتاپتىڭ رەداكتورى – بەلگىلى جۋرناليست، قالامگەر، پۋبليسيست قاينار ولجاي. ول جي سالاسىنا قاتىستى قازاق تىلىندەگى تەرميندەردى قالىپتاستىرۋ قاجەتتىگىن اتاپ ءوتىپ، وسى باعىتتا جۇيەلى جۇمىس جۇرگىزۋ كەرەكتىگىن ۇسىندى.
جالپى، جي سالاسى ەلىمىزدە ەندى عانا دامىپ كەلەدى. اسىرەسە قازاق ءتىلدى اۋديتوريا ءۇشىن بۇل وتە قاجەت كىتاپ. وسىنى ەسكەرگەن اۆتورلار كىتاپتى تەك باسپا تۇرىندە عانا ەمەس، ارنايى «AI-Hub» سايتىن اشىپ، سيفرلى فورماتتا دا ۇسىنۋدى قولعا العان.