2025 جىلى زووباقتا 31 ءتۇرلى جانۋاردان 87 ءتول دۇنيەگە كەلدى. سونداي-اق، زووباق كوللەكسياسى جىل سايىن جاڭا جانە سيرەك كەزدەسەتىن بيزون، تاماندۋا، سيۆەتا، گەنەتا، اگاما سياقتى تۇرلەرمەن تولىقتىرىلدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى مادەنيەت باسقارماسىنىڭ باسشىسى دانيار الييەۆ مالىمدەدى.
بۇگىنگى تاڭدا الماتى حايۋاناتتار باعى – قازاقستانداعى ەڭ كونە جانە بەدەلدى زووباقتاردىڭ ءبىرى. اۋماعى 21 گەكتاردى قامتيتىن حايۋاناتتار باعىندا قازىرگى ۋاقىتتا 385 تۇرگە جاتاتىن 4000-نان استام جانۋار، قۇس جانە باۋىرىمەن جورعالاۋشىلار بار. ولاردىڭ 76 ءتۇرى حالىقارالىق تابيعاتتى قورعاۋ وداعىنىڭ قاۋىپسىزدىك تىزىمىنە، ال 24 ءتۇرى قازاقستان رەسپۋبليكاسىنىڭ قىزىل كىتابىنا ەنگىزىلگەن.
"2025 جىلى زووباققا كەلۋشىلەر سانى 1،2 ميلليون ادامعا جەتتى. بۇل ءبىزدىڭ زووباقتىڭ ەلدەگى جانە ايماقتاعى تانىمالدىعىن ايقىن كورسەتەدى. جىل سايىن كەلۋشىلەر سانىنىڭ ءوسۋى – ءبىزدىڭ جۇمىستارىمىزدىڭ جانە تابيعاتتى قورعاۋ ميسسيامىزدىڭ كورىنىسى"، - دەدى باسقارما باسشىسى دانيار الييەۆ.
2025 جىلى الماتى حايۋاناتتار باعى ەۋروپالىق زووباقتار مەن اكۆاريۋمدار قاۋىمداستىعىنىڭ تولىققاندى مۇشەسى رەتىندە قابىلداندى. بۇل مارتەبە زووباقتىڭ حالىقارالىق ستاندارتتارعا ساي ەكەنىن، جانۋارلاردى قورعاۋ جانە عىلىمي زەرتتەۋلەردە جاڭا مۇمكىندىكتەرگە قول جەتكىزەتىنىن راستايدى.
الماتى حايۋاناتتار باعى بيىل اۋقىمدى رەكونسترۋكسيادان وتەدى. جوبانىڭ ماقساتى – كەلۋشىلەرگە ىڭعايلى، زاماناۋي جانە ءبىلىم بەرۋ تۇرعىسىنان باي تاجىريبە ۇسىنۋ. جوبانىڭ اياقتالۋىمەن زووباق جىلىنا 2 ميلليونعا دەيىن ادامدى قارسى الا الادى.
الماتى حايۋاناتتار باعى – تابيعاتقا دەگەن سۇيىسپەنشىلىكتى ارتتىراتىن، بالالار مەن ەرەسەكتەرگە ءبىلىم مەن اسەر قالدىراتىن ەرەكشە ورىن. جاڭا كەزەڭدە زووباق تەك الماتىنىڭ عانا ەمەس، بۇكىل ورتالىق ازيانىڭ ەڭ ءىرى جانە زاماناۋي ورتالىعىنا اينالۋى كۇتىلۋدە.