مەملەكەت باسشىسى قاسىم-جومارت توقايەۆتىڭ الماتى قالاسىن "ۇيىقتامايتىن" مەگاپوليسكە اينالدىرۋ جونىندەگى تاپسىرماسىنا سايكەس، قالادا تاۋلىك بويى جۇمىس ىستەيتىن مادەني نىسانداردىڭ سانى كەزەڭ-كەزەڭىمەن كوبەيىپ كەلەدى. وسى باستاما اياسىندا اقپان ايىنان باستاپ الماتىداعى تاعى 2 كىتاپحانا 24/7 فورماتتا جۇمىس ىستەۋگە كوشەدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى مادەنيەت باسقارماسىنىڭ باسشىسى دانيار الييەۆ مالىمدەدى.
بۇگىنگى تاڭدا باسقارماعا قاراستى الماتى قالاسى ورتالىقتاندىرىلعان كىتاپحانا جۇيەسىنە 30 قالالىق كىتاپحانا كىرەدى. بارلىق كىتاپحاناداعى جالپى كىتاپ قورى 1 372 423 داناعا جەتكەن.
"قالالىق كىتاپحانالار زاماناۋي تالاپتارعا ساي جاڭارىپ، تۇرعىندار ءۇشىن قولجەتىمدى مادەني ءارى زياتكەرلىك كەڭىستىككە اينالىپ كەلەدى. 2025 جىلى كىتاپحانالارعا كەلۋشىلەر سانى شامامەن 3،1 ميلليون بولسا، ال تۇراقتى وقىرماندار سانى 300 مىڭنان استى"، – دەدى دانيار الييەۆ.
قازىرگى تاڭدا جامبىل اتىنداعى جاسوسپىرىمدەر كىتاپحاناسى، "Alatau Creative Hub" جانە مۇحتار اۋەزوۆ اتىنداعى كىتاپحانا تاۋلىك بويى قىزمەت كورسەتەدى. جۇمىس رەجيمى وزگەرگەننەن كەيىن بۇل ءۇش فيليالعا كەلۋشىلەر سانى 70 پايىزعا ارتقان. وسى تاجىريبەنى ەسكەرە وتىرىپ، اقپان ايىندا قازاقستان جازۋشىلار كىتاپحاناسى مەن روزىباكييەۆ كوشەسى، 247 مەكەنجايىندا ورنالاسقان فيليالى 24/7 رەجيمىندە جۇمىس ىستەۋگە كوشەدى.
سونىمەن قاتار، قالادا كىتاپحانا قىزمەتىنىڭ قولجەتىمدىلىگىن ارتتىرۋ ماقساتىندا ساۋدا ورتالىقتارىندا، مەترو بەكەتتەرىندە، مەكتەپتەردە، كوۆوركينگتەر مەن كوممۋنالدىق ورتالىقتاردا 32 دەربەس وزىنە-وزى قىزمەت كورسەتۋ كىتاپحاناسى ورناتىلعان. بۇل نۇكتەلەردى 300-گە جۋىق تۇراقتى وقىرمان پايدالانادى، اي سايىن 500-دەن استام كىتاپ بەرىلەدى.
كىتاپحانالاردى جاڭعىرتۋ جۇمىستارى جۇيەلى تۇردە جۇرگىزىلىپ كەلەدى. 2025-2026 جىلدارى جاڭا قالالىق 2 كىتاپحانا اشىلسا، بيىل جىل سوڭىنا دەيىن از قامتىلعان اۋدانداردا تاعى 3 جاڭا كىتاپحانا اشۋ جوسپارلانىپ وتىر.
كىتاپ قورىن سيفرلاندىرۋ باعىتىندا دا اۋقىمدى جۇمىستار اتقارىلۋدا. 2025 جىلى سكانەرلەۋ تەحنيكاسىنىڭ كومەگىمەن 70 پايىز كىتاپ قورى سيفرلاندىرىلىپ، 2027 جىلدىڭ سوڭىنا دەيىن بارلىق كىتاپ قورىن تولىق سيفرلاندىرۋ جوسپارلانۋدا.
بۇدان بولەك، ورتالىقتاندارىلعان كىتاپحانا جۇيەسىندە سيرەك كىتاپتاردى قالپىنا كەلتىرۋ زەرتحاناسى جۇمىس ىستەيدى. بۇگىنگە دەيىن 335 كىتاپ رەستاۆراسيادان ءوتىپ، ونىڭ 65ء-ى سيرەك باسىلىمدار قاتارىنا جاتادى.
ينكليۋزيۆتى ورتا قالىپتاستىرۋ ماقساتىندا ورتالىقتاندارىلعان كىتاپحانا جۇيەسىنىڭ 8 فيليالىندا كورۋ قابىلەتى تومەن ازاماتتارعا ارنالعان اۋديو دىبىس جانە برايل ديسپلەيى ارقىلى اقپارات الۋعا مۇمكىندىك بەرەتىن ارنايى جۇمىس ورىندارى جابدىقتالعان. سونداي-اق، ياندەكس قازاقستان كومپانياسىمەن بىرلەسىپ، مۇمكىندىگى شەكتەۋلى جاندار ءۇشىن تەگىن كىتاپ جەتكىزۋ قىزمەتى ىسكە قوسىلعان.
الماتى قالاسىنىڭ كىتاپحانالارى وسىلايشا زاماناۋي فورماتتا دامىپ، تۇرعىنداردىڭ بىلىمگە، مادەنيەتكە جانە اقپاراتقا تاۋلىك بويى قول جەتكىزۋىنە جاعداي جاساپ وتىر.