الماتى قالاسى بويىنشا قاج دەپارتامەنتىنە قاراستى №13 مەكەمەسىندە جازاسىن وتەپ جاتقان سوتتالعاندار 10 تامىز – اباي كۇنىن اتاپ ءوتتى.
ۇلى اقىن كۇنىنە ارنالعان “ابايدى ءسۇي، ادام بول” اتتى ءىس-شارادا سوتتالعاندار اباي ولەڭدەرىنە ەرەكشە نازار اۋدارىپ، اباي وقىعان كىتاپتارمەن، اقىننىڭ قوعامدىق قىزمەتىمەن جانە اباي ءداۋىرىن سۋرەتتەيتىن سيرەك كەزدەسەتىن ولكەتانۋ باسىلىمدارىمەن تانىستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
سونىمەن قاتار اتالعان مەرەكەنى ۇيىمداستىرۋشى سوتتالعاندار اراسىنداعى تاربيە جانە الەۋمەتتىك-پسيحولوگيالىق جۇمىس ءبولىمىنىڭ جاساق باستىقتارى سوتتالعاندار اراسىندا اباي ولەڭدەرىن وقۋدان سايىس وتكىزدى.
«قىلمىس جاساپ جازاعا تارتىلعاندارعا اباي اتامىزدىڭ ولەڭدەرىندەگى وسيەت ۇلكەن وي سالدى. سايىس بارىسىندا ولار اسىرەسە ابايدىڭ “عىلىم تاپپاي ماقتانبا” دەگەن ولەڭىن ناقىشىنا كەلتىرىپ وقىپ قانا قويماي، اقىننىڭ “وسەك، وتىرىك، ماقتانشاق. ەرىنشەك، بەكەر مال شاشپاق. بەس دۇشپانىڭ بىلسەڭىز” دەگەن وسيەتىن ءوزارا تالقىلاپ، پىكىر الماستى. عۇلاما اقىننىڭ ادامعا وي سالار ولەڭدەرى سوتتالعانداردىڭ بولاشاقتا ادال ەڭبەكپەن ءومىر سۇرۋگە دەگەن قۇشتارلىعىن ارتتىرا تۇسەتىنى انىق»، – دەيدى جاساق باستىعى ا. شاكيربايەۆ.