الماتى اكىمى دارحان ساتىبالدى فرانسيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سيلۆان گيوگەمەن كەزدەستى.
كەزدەسۋدە ەكونوميكا، كاسىپكەرلىكتى دامىتۋ، مادەني-گۋمانيتارلىق بايلانىستار، سونداي-اق كولىك ينفراقۇرىلىمى، قالالىق ورتانى جاڭعىرتۋ جانە مەگاپوليستە جايلى ءومىر ءۇشىن زاماناۋي شەشىمدەردى ەنگىزۋ ماسەلەلەرى تالقىلاندى.
دارحان ساتىبالدى الماتى ەلىمىزدىڭ ءىرى مەگاپوليسى رەتىندە فرانسۋز بيزنەسىمەن ءارتۇرلى سالالاردا – تۋريزم، ءقوناقۇي يندۋسترياسى، شاعىن جانە ورتا كاسىپكەرلىك باعىتىندا سەرىكتەستىككە اشىق ەكەنىن اتاپ ءوتتى.
"بۇگىندە الماتىدا فرانسۋز كاپيتالىنىڭ قاتىسۋىمەن شامامەن 60 كاسىپورىن جۇمىس ىستەيدى. 2005 جىلدان بەرى قازاقستان ەكونوميكاسىنا قۇيىلعان فرانسۋز ينۆەستيسياسىنىڭ جالپى كولەمى 20 ملرد دوللاردان استى. ءبىز سەرىكتەستەر ءۇشىن بارلىق جاعدايدى جاساپ وتىرمىز: قالادا ارنايى ەكونوميكالىق جانە يندۋستريالىق ايماقتار بار. سونىمەن قاتار مادەني-گۋمانيتارلىق بايلانىستار دا بەلسەندى دامۋدا. الماتىدا فرانسۋز ءتىلى مەن مادەنيەتى جوعارى باعالانادى. قالامىزدىڭ ىسكەرلىك ورتاسى سەرگەك، جاڭاشىلدىققا اشىق ءارى سەنىمدى سەرىكتەستىككە ۇمتىلىسىمەن ەرەكشەلەنەدى"، – دەدى الماتى اكىمى دارحان ساتىبالدى.
ءوز كەزەگىندە سيلۆان گيوگە فرانسيانىڭ ءبىلىم، مادەنيەت جانە ەكونوميكا سالالارىندا ىنتىماقتاستىقتى كەڭەيتۋگە جانە بىرلەسكەن جوبالاردى جۇزەگە اسىرۋعا مۇددەلى ەكەنىن جەتكىزدى.
كەزدەسۋ سوڭىندا تاراپتار ەكىجاقتى بايلانىستاردى نىعايتۋ جانە قازاقستان مەن فرانسيانى جاقىنداستىراتىن جاڭا باستامالاردى دامىتۋ نيەتىن راستادى.