الماتى – ەلىمىز بويىنشا تەاترى ەڭ كوپ قالا

تەاترلاردىڭ نەگىزگى ۇلەسى – دراما تەاترلار

الماتى قالاسى ەلىمىزدەگى تەاترلاردىڭ ەڭ كوپ شوعىرلانعان جەرى. بۇل تۋرالى ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى ءمالىم ەتتى، دەپ حابارلايدى Almaty-akshamy.kz.

بيۋرو مالىمەتىنشە، 1932 جىلى ەلىمىزدە تەك 2 تەاتر جۇمىس ىستەگەن. 4 جىلدان كەيىن ولاردىڭ سانى 24-كە جەتەدى.

«بۇگىنگى تاڭدا قازاقستاننىڭ 65 تەاترىندا قويىلىمدار ساحنالانادى. ونىڭ 10-ى – جەكەمەنشىك. تەاترلاردىڭ كوپ بولىگى الماتىدا شوعىرلانعان، وندا 18 تەاتر جۇمىس ىستەيدى. استانادا 9 ونەر ءۇيى بار، ال شىمكەنتتە – 6. تەاترلاردىڭ نەگىزگى ۇلەسى – دراما تەاترلار. ولاردىڭ سانى – 36. قازاقستان بويىنشا 4 وپەرا جانە بالەت تەاترى بار، مۋزىكالىق تەاترلاردىڭ سانى دا ءدال سونشا. جاس كورەرمەندەر ءۇشىن 6 تەاتر جانە تاعى 9 قۋىرشاق تەاترى بار»، - دەلىنەدى حابارلامادا.

بۇدان بولەك، تەاترعا كەلۋشىلەردىڭ كوپشىلىگى دە الماتىدا.

«2021 جىلى تەاترلاردا 2 565 قويىلىم كورسەتىلدى. ونىڭ 319-ى جاڭادان ساحنالانعان. وتكەن جىلى ارتىستەردىڭ ويىنىن 1 172 718 كورەرمەن تاماشالاعان. ال، كورەرمەننىڭ باسىم بولىگى الماتى (278،3 مىڭ ادام)، استانا (211،3 مىڭ ادام) جانە شىعىس قازاقستان وبلىسىنىڭ (137،2 مىڭ ادام) تەاترلارىندا بولدى»، - دەپ حابارلادى ۇلتتىق ستاتيستيكا بيۋروسى.