تۋىندىنىڭ سەناريي اۆتورلارى - مۇرات ەسجان، ۇلاربەك نۇرعالىم جانە ۇشقىن ءسايدىراحمان
تاريحي سەريال الاش قايراتكەرى ءمىرجاقىپ دۋلات ۇلىنىڭ ءومىرى، شىعارماشىلىعى مەن ساياسي كۇرەسى جايىندا. سول زامانداعى ايتۋلى وقيعاعا نەگىزدەلگەن. رەجيسسەر مۇرات ەسجان بىلتىر كوپتىڭ نازارىنا ۇلت ۇستازى احمەت بايتۇرسىن ۇلى تۋرالى سەريال ۇسىنىپ، كورەرمەندەردەن جوعارى باعا العان بولاتىن دەپ حابارلايدى Almaty-akshamy.kz inbusiness.kz-كە سىلتەمە جاساپ.
الداعى ەكى كۇنى بويى شىعارماشىلىق توپ قوستاناي قالاسىندا ءتۇسىرىلىم جاسايدى. ول ءۇشىن قالاداعى تاريحتان سىر شەرتەتىن كونە عيماراتتار ارنايى تاڭدالعان. ءتۇسىرىلىم جۇمىستارى ءمىرجاقىپ دۋلات ۇلىنىڭ تۋعان جەرى جانگەلدى اۋدانى، قىزبەل اۋىلىندا دا جالعاسپاق. ول جەردە ءمىرجاقىپتىڭ بالالىق شاعى مەن العاشقى ۇلكەن ومىرگە قادام باسقان ساتتەرى ۆيدەوعا تاسپانالادى.
"وتكەن جىلى "احمەت. ۇلت ۇستازى" كينوسىن تۇسىرگەندە ونىڭ تۋىپ-وسكەن جەرى تورعايدىڭ نازاردان تىس قالعانىنا سىن ايتىلدى. كوپتەگەن كورەرمەندەر بۇدان بىلاي مۇنداي قاتەلىككە جول بەرمەۋدى ءوتىندى. سوندىقتان بۇل جولى ءبىز اقىن ءمىرجاقىپ دۋلات ۇلىنىڭ تۋعان جەرىندە ءتۇسىرىلىم جاساۋدى ۇيعاردىق"، – دەيدى تەلەحيكايانىڭ رەجيسسەرى مۇرات ەسجان.
جوبا باس پروديۋسەرى ايساۋلە ابىلدايەۆانىڭ ايتۋىنشا، 6 cەريادان تۇراتىن تۋىندىعا قاجەتتى دەكوراسيانى تاڭداۋ ءۇشىن شىلدە ايىندا قوستانايعا كەلىپتى. "ءمىرجاقىپ" سەريالىنىڭ ءتۇسىرىلىمى 17 تامىزدا الماتى وبلىسىندا باستالدى. ول ولكەدە ءبىز ەڭ كوپ ماتەريال جينادىق. قوستاناي جەرىنە كەلۋىمىزدىڭ باستى سەبەبى - تاريحي تۋىندىعا ءوڭ بەرەتىن نەگىزگى ساتتەردى ءتۇسىرۋ.
سەريالدا ءمىرجاقىپتىڭ ءرولىن اكتەر باقىت قاجىبايەۆ، ال جارى عاينيكامال رولىندە اكتريسا زارينا كارمەن. سەريالدا ءاليحان بوكەيحانوۆ ءرولىن باۋىرجان قاپتاعاي، احمەت بايتۇرسىنۇلىن بايعالي ەسەنالييەۆ سومدايدى.
تۋىندى تاۋەلسىزدىك مەرەكەسى قارساڭىندا ۇلتتىق ارنادان كورسەتىلەدى دەپ جوسپارلانىپ وتىر.