پرەزيدەنت مەديسينالىق-سانيتاريالىق العاشقى كومەك جونىندەگى جاھاندىق كونفەرەنسيانىڭ پلەنارلىق وتىرىسىنا قاتىستى، دەپ حابارلايدى almaty-akshamy.kz
قاسىم-جومارت توقايەۆ مەديسينالىق-سانيتاريالىق العاشقى كومەك (مساك) جونىندەگى الماتى دەكلاراسياسىنىڭ قابىلدانعانىنا 45 جىل جانە استانا دەكلاراسياسىنا 5 جىل تولۋىنا وراي ۇيىمداستىرىلعان جاھاندىق كونفەرەنسيانىڭ پلەنارلىق وتىرىسىنا قاتىستى.
مەملەكەت باسشىسى كونفەرەنسيا قاتىسۋشىلارىنا ءىلتيپات بىلدىرە وتىرىپ، دەنساۋلىق ساقتاۋ جانە مەديسينالىق-سانيتاريالىق العاشقى كومەك كورسەتۋدىڭ حالىقارالىق جۇيەسىن جەتىلدىرۋ ىسىندە الماتى جانە استانا دەكلاراسيالارىنىڭ ماڭىزى زور ەكەنىن اتاپ ءوتتى.
– وسىدان 45 جىل بۇرىن مەديسينالىق-سانيتاريالىق العاشقى كومەكتىڭ الەۋمەتتىك تۇرعىدا ادىلەتتى مودەلىنە نەگىز بولعان الماتى دەكلاراسياسى قابىلداندى. بۇل دەكلاراسيا الەمدىك دەنساۋلىق ساقتاۋدىڭ ۇلى حارتياسىنا اينالىپ، كوپتەگەن ەلدىڭ حالىق دەنساۋلىعىن جاقسارتۋ ءۇشىن شارا قابىلداۋىنا، ونى ادامنىڭ ىرگەلى قۇقىعى رەتىندە مويىنداۋىنا تۇرتكى بولدى. الماتى دەكلاراسياسى ءبىراز ەلدە انا مەن بالا ءولىمىنىڭ دەڭگەيىن جۇيەلى تۇردە تومەندەتۋ، بولجامدى ءومىر ءسۇرۋ جاسىن ۇزارتۋ ءۇشىن شەشۋشى ءرول اتقاردى. بۇگىندە كوپتەگەن ەلدە ۇلتتىق دەنساۋلىق ساقتاۋ جۇيەسى جولعا قويىلعان. وندا مەديسينالىق-سانيتاريالىق العاشقى كومەككە ايرىقشا ءمان بەرىلەدى. بۇل بەس جىل بۇرىن قول قويىلعان استانا دەكلاراسياسىندا ناقتىلانادى، – دەدى پرەزيدەنت.
قاسىم-جومارت توقايەۆتىڭ ايتۋىنشا، مساك جۇيەسى ەپيدەميانىڭ العاشقى بەلگىلەرىن انىقتاۋ جانە توسىن سىن-قاتەرلەرگە قارسى ارەكەت ەتۋ ىسىندە ماڭىزدى ءرول اتقارادى
مەملەكەت باسشىسى قوعامدىق دەنساۋلىق ساقتاۋ ۇيىمدارى وزدەرىنىڭ ورنىقتىلىعىن جانە تۋىنداعان جاعدايعا تەز بەيىمدەلە الاتىنىن كورسەتكەنىنە نازار اۋداردى.
پرەزيدەنت ادامزاتتىڭ COVID پاندەمياسىن ەڭسەرۋىنە ۇلەس قوسقانى ءۇشىن بارلىق مەديسينا قىزمەتكەرىنە العىس ايتتى.
قاسىم-جومارت توقايەۆتىڭ پىكىرىنشە، بارلىق ىقتيمال قاۋىپ-قاتەردى ەسكەرە وتىرىپ، دەنساۋلىق ساقتاۋ جۇيەسى كەز كەلگەن كۇردەلى جاعدايعا ءاردايىم دايىن بولۋى ءۇشىن وعان قولداۋ كورسەتۋ كەرەك. اۋرۋ-سىرقاۋدىڭ بەلگىلەرىن باستاپقى كەزەڭىندە انىقتاۋ جانە توسىن سىن-قاتەرلەرگە دەر كەزىندە نازار اۋدارۋ ءۇشىن الەۋەتتى ارتتىرا بەرۋ قاجەت.