الماتى دارىگەرلەرىنىڭ شالا تۋعان ءسابيدىڭ كوزىنە جاساعان وتاسى ءساتتى ءوتتى

شالا تۋعان شاقالاققا رەتينوپاتيا دياگنوزى قويىلىپ، دەر كەزىندە وتا جاسالدى

وتا جاسالعان ءسابي پەريناتولوگيا جانە بالالار كارديوحيرۋرگياسى ورتالىعىندا جۇكتىلىكتىڭ 29 اپتاسىندا 900 گرامم سالماقپەن شالا تۋعان، دەپ حابارلايدى Almaty-akshamy.kz

جاڭا تۋعان نارەستەنى سكرينينگ اياسىندا دارىگەرلەر كوزدىڭ اۋىر اۋرۋى – شالا تۋعان نارەستەلەردىڭ رەتينوپاتياسى دياگنوزىن قويعان. 

«رەتينوپاتيا – كوزدىڭ اۋىر اۋرۋى، نەگىزىنەن تەرەڭ شالا تۋعان نارەستەلەردە داميدى. اۋرۋ تەز داميدى: ەگەر بىرنەشە كۇن ىشىندە ميكروحيرۋرگيالىق وپەراسيا جاسالماسا، بالا سوقىر بولىپ قالۋى مۇمكىن.

رەتينالدى ترانسپۋپيلليارلى لازەرلىك كواگۋلياسيا وتكىزىلدى. وپەراسيا ءساتتى ءوتتى. ءقازىر بالا جاڭا تۋعان نارەستەلەر پاتولوگياسى بولىمىندە. دارىگەرلەر ونىڭ جاعدايىن تۇراقتى دەپ باعالايدى، وپەراسيادان كەيىنگى كەزەڭ اسقىنۋسىز وتەدى»، –  دەيدى ورتالىقتىڭ باس دارىگەرى گۇلنارا نۇرلانوۆا.

تەك قىركۇيەك ايىنىڭ وزىندە پەريناتولوگيا جانە بالالار كارديوحيرۋرگياسى ورتالىعىندا وسىنداي 8 جوعارى تەحنولوگيالىق وتا جاسالدى، جىلىنا 70-كە جۋىق وتا جاسالدى.

بۇل وپەراسيالار ءمامس شەڭبەرىندە تەگىن جۇرگىزىلەدى.

ستاتيستيكاعا سايكەس، بۇكىل الەمدە شالا تۋىلعان رەتينوپاتيا ەرتە جاستاعى بالالاردىڭ سوقىرلىعى مەن ناشار كورۋىنىڭ نەگىزگى سەبەپتەرىنىڭ ءبىرى بولىپ سانالادى.