الماتى دارىگەرلەرى كۆي جۇقتىرعانداردىڭ سانى تامىز ايىندا ءوسۋى مۇمكىن دەگەندى ايتادى

بولجام بويىنشا، ىندەتكە شالدىققاندار سانى 10-11 تامىز ارالىعىندا ءوسۋى ىقتيمال.

دەنساۋلىق ساقتاۋ سالاسىنداعى بولجاۋ توبى "كوروناۆيرۋس دەرتىنە شالدىققان الماتىلىقتاردىڭ سانى تاۋلىگىنە 800-840 ادامعا جەتۋى مۇمكىن" دەپ بولجاپ وتىر، دەپ حابارلايدى Almaty-akshamy.kz.

الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ وڭىرلىك كوممۋنيكاسيالار قىزمەتىنىڭ الاڭىندا «الماتى قالاسىندا «دەلتا» شتامىنىڭ تارالۋىنا بايلانىستى ەپيدەميولوگيالىق جاعدايدىڭ اسقىنۋى تۋرالى» تاقىرىبىندا وتكەن ونلاين باسپاسوز-كونفەرەنسياسى بارىسىندا كوروناۆيرۋس ىندەتى الداعى ايدىڭ 10-11 كۇندەرى ءورشي ءتۇسۋى مۇمكىن دەگەندى ايتتى. 

«بىزدە بولجام جاسايتىن ارنايى توپ بار. ولار الداعى ءۇش ايعا بولجام جاساپ بەرگەن. ءبىز سول بولجام بويىنشا جۇمىسىمىزدى كۇشەيتىپ، ارەكەتتەنىپ جاتىرمىز. ولاردىڭ بولجامى بويىنشا، سOVID-19 ىندەتىن جۇقتىرۋشىلار سانى تامىز ايىنىڭ 10-11 كۇندەرى ارالىعىندا كوبەيەدى. قازىرگى كەزدە كۇنىنە 400-420 ادام تىركەلسە، تامىز ايىندا بۇل كورسەتكىش 800-840 دەيىن كوبەيۋى ىقتيمال. بىزدە ءتۇرلى بولجامدار بار، ءبىر بولجام پەسسيميستىك بولسا، ەكىنشى بولجام وپتيميستىك. ءبىز بارلىق جاعدايعا دايىندالىپ جاتىرمىز»، -دەدى  ناريمان تابىنبايەۆ.

دارىگەردىڭ ايتۋىنشا، ءقازىردىڭ وزىندە جاعداي قيىن بولىپ تۇر، ءبىراق جاعداي كۇردەلەنەتىن بولسا، اۋرۋعا توتەپ بەرۋ ءۇشىن قوسىمشا توسەك-ورىندار دايىندالىپ جاتىر. وسى ماقساتتا مەدبيكەرلەر مەن تازالىقشىلارعا ارنايى كۋرستتار ۇيىمداستىرىلىپ، دارىگەر ماماندىعى بويىنشا ءبىلىم الىپ جۇرگەن ستۋدەنتتەردى دايىنداپ جاتىر.