اۋرۋحاناعا جاتقىزىلعان ناۋقاستار سانى ءوسىپ جاتىر.
الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ وڭىرلىك كوممۋنيكاسيالار قىزمەتىندە وتكەن بريفينگتە حالىقتى تاعى دا ۆاكسينا الۋعا شاقىردى. ول جۇكتەمەنىڭ دارىگەرلەرگە، اسىرەسە، العاشقى مەديسينالىق كومەككە ەداۋىر ارتقانىن ايتتى، دەپ حابارلادى Almaty-akshamy.kz.
قالالىق دەنساۋلىق باسقارماسى باسشىسىنىڭ ايتۋىنشا، اۋرۋحاناعا جاتقىزىلعان ناۋقاستار سانى وسۋدە. ەگەر ءبىر اي بۇرىن بۇل كورسەتكىش تاۋلىگىنە 40-70 ناۋقاس بولسا، بۇگىندە جۇقپالى اۋرۋلار اۋرۋحاناسىندا ەمدەلۋدى قاجەت ەتكەن كوروناۆيرۋسپەن اۋىراتىن ناۋقاستاردىڭ سانى 400 ادامعا جەتەدى.
«كوپتەگەن ناۋقاستار ۇيدە ەمدەلۋدە. ءقازىردىڭ وزىندە 7 361 ناۋقاس باقىلاۋدا. تەلەمەديسينا ورتالىعىنىڭ شتاتىن قوسىمشا مامانداردى تارتا وتىرىپ، ناۋقاستارعا قاشىقتان كەڭەس بەرەتىن 84 قىزمەتكەرگە دەيىن كوبەيتۋگە تۋرا كەلدى»، – دەدى ناريمان تابىنبايەۆ.
قدب باسشىسى ءبىرىنشى كەزەكتەگى مىندەت ءولىم جاعدايىنىڭ كوبەيۋىنە جول بەرمەۋ ەكەنىن ايتتى.
«الماتىدا "جەدەل جاردەم" شاقىرۋدىڭ تاۋلىكتىك سانى 2 700-گە جەتتى. شىلدە ايىندا جرۆي، كۆي جانە پنيەۆمونيامەن شاقىرۋدىڭ ۇلەسى 2 ەسە ارتتى. تاۋەكەل توبىندا ءالى دە سوزىلمالى اۋرۋلارمەن اۋىراتىن ادامدار بار»، – دەدى سپيكەر.
ناريمان تابىنبايەۆتىڭ ايتۋىنشا، جاڭا «دەلتا» شتامى جاستار قاۋىمىنا ءقاۋىپتى. الماتىدا 40 جاسقا دەيىنگى 2 ادام كوروناۆيرۋستان قايتىس بولدى.
«كوروناۆيرۋستىڭ جاڭا شتامىن جۇقتىرعان ناۋقاستاردىڭ جاعدايى التى ساعات ىشىندە ناشارلاۋدا»، – دەپ تولىقتىردى قدب باسشىسى.
ەسكە سالساق، كۆي تارالۋىنا قارسى تۇرۋدىڭ جالعىز جولى ۆاكسينا الۋ. ن.تابىنبايەۆ الماتىلىقتاردى ءوز دەنساۋلىعى مەن جاقىندارىنىڭ دەنساۋلىعىن ساقتاۋ ءۇشىن بەلسەندى تۇردە ۆاكسينا الۋعا شاقىردى.
الماتىدا ەكپە پۋنكتتەرىنىڭ كەڭ جەلىسى اشىلدى. كۇن سايىن 15-20 مىڭعا دەيىن ەكپە الۋعا مۇمكىندىك بار. 26 شىلدەدەگى جاعداي بويىنشا، ۆاكسينانىڭ 1ء-شى كومپونەنتىنىڭ 768 545 دوزاسى جانە 2ء-شى كومپونەنتىنىڭ 499 185 دوزاسى الىندى.