قاراگوز سۇلەيمەنوۆا، «الماتى اۋەندەرى» كمقك-نىڭ ءانشىسى، تەلەجۇرگىزۋشى:
- قازاق ەلى مەن جۇڭگو اراسىنداعى ۆيزاسىز تارتىپپەن قارىم-قاتىناس ەنگىزىلۋىنە قاتىستى ايتارىم، الدىمەن ءتۋريزمدى دامىتۋعا ءمان بەرىلۋى كەرەك. بۇل جاعداي ەلىمىز ەكونوميكالىق داعدارىسقا ۇشىراماسا دا، قاجەتتىلىك. الايدا، بۇل ماسەلە حالىقارالىق زاڭ نورمالارىمەن رەتتەلۋى ءتيىس. سوندا عانا بارىس-كەلىس باياندى، ەكونوميكالىق قارىم-قاتىناس قارقىندى بولادى دەپ ويلايمىن.
قالاي بولعاندا دا، قىتايلىق تاۋار تاسىمالداۋشىلار جەرگىلىكتى، وتاندىق كاسىپكەردىڭ ءونىمىن ىعىستىرىپ تاستاماۋى ءتيىس. الاش قايراتكەرلەرىنىڭ ءوزى قىتايلىقتاردىڭ ساۋدامەن جاۋلاپ الاتىن ءقاۋپىن باسا ايتقانىن قالايشا ەسكەرمەسكە؟ بۇل مەملەكەتارالىق كەلىسىممەن جۇزەگە اساتىن شارۋا بولسا-داعى، قازاعىمىزدىڭ ۇلتتىق ساناسىنا، سالت-داستۇرىمىزگە نۇقسان كەلمەۋى كەرەك.
سول قىتايدىڭ وزىنە نە رەسەيگە بارساڭ، سول ەلدىڭ زاڭ نورمالارى الدىڭنان قارسى الىپ، سان الۋان شەكتەۋ شىعا كەلەتىنى راس. ءبىزدىڭ ەلدىڭ تالابى دا سونداي بولۋى قاجەت. الەۋمەتتىك جەلىدەگى پىكىرلەردىڭ ءبارى بىردەي نەگىزسىز ەمەستىگى وسىندايدا ويعا ورالادى. «حالىق ايتسا، قالت ايتپايدى» دەگەن بەكەر بولماعانى.
ەل-جۇرتتىڭ ءقاۋىپ ەتەر تۇسى دا بارشىلىق. سول جاعداي ەرەكشە ەسكەرىلىپ، قارىم-قاتىناستىڭ زاڭدىلىعى قاداعالانۋى قاجەت. ۇلان-عايىر جەرىمىزدىڭ اماندىعى ماڭىزدى. ەرتەرەكتە جۇڭگو قىتايدان: «تاماق جەدىڭ بە؟» دەپ سۇرايدى ەكەن. استارلى ءمانىسى بار. سول سەبەپتەن، اسا ساقتىقپەن ديپلوماتيالىق باي تاجىريبەگە سۇيەنەر شاق كەلدى دەپ سانايمىن.