الماتى اكىمدىگىندە قالا اكىمى دارحان ساتىبالدى مەن ورتالىق ازيا ءوڭىرى بويىنشا BYD كومپانياسىنىڭ باسقارۋشى ديرەكتورى ايۆان ساومەن كەزدەستى.
كەزدەسۋدىڭ نەگىزگى تاقىرىبى تۇركسىب اۋدانىندا ورنالاسقان "استانا موتورس" كوممەرسيالىق تەحنيكا زاۋىتى بازاسىندا BYD ەلەكتروبۋستارى ءوندىرىسىن جولعا قويۋ ماسەلەسى بولدى.
جوبا اياسىندا ءىرى توراپتى قۇراستىرۋدان باستاپ، دانەكەرلەۋ، شاناق بوياۋ جانە قوسالقى بولشەكتەردى دايىنداۋ سىندى وندىرىستە جەرگىلىكتى ۇلەس كەزەڭ-كەزەڭىمەن ارتادى. بۇل ەكولوگيالىق تازا ءارى ەنەرگيا ۇنەمدەيتىن كولىك تۇرىنە باسىمدىق بەرە وتىرىپ، قالالىق كولىك ينفراقۇرىلىمىن جاڭعىرتۋداعى ماڭىزدى قادام بولماق.
BYD قازاقستاندا باستى ءونىمى – B12 ماركالى ەلەكتر اۆتوبۋسى ءوندىرىسىن ىسكە قوسۋدى جوسپارلاپ وتىر. بۇل ۇلگى كولىك شاسسيىنە ورناتىلعان Blade اككۋمۋلياتورلىق باتارەياسىمەن جابدىقتالعان. مۇنداي تەحنيكالىق شەشىم اۆتوبۋسقا قوسىمشا بەرىكتىك پەن قاۋىپسىزدىك بەرىپ قانا قويماي، ءجۇرىس قاشىقتىعىن ارتتىرىپ، ەنەرگيا تۇتىنۋىن ەداۋىر ازايتادى. Blade Battery الەمدەگى ەڭ ءقاۋىپسىز اككۋمۋلياتورلاردىڭ ءبىرى رەتىندە تانىلعان، وعان 10 جىلعا دەيىن كەپىلدىك بەرىلەدى.
"ەكولوگيالىق تازا كولىك تۇرلەرىن دامىتۋ – الماتىنىڭ ستراتەگيالىق باسىمدىعى. ەلەكتروبۋس ءوندىرىسىنىڭ جەرگىلىكتى دەڭگەيدە ىسكە قوسىلۋى اۋاعا شىعاتىن زياندى زاتتاردى ازايتىپ قانا قويماي، جاڭا جۇمىس ورىندارىن اشۋعا، قالانىڭ وندىرىستىك الەۋەتىن نىعايتۋعا مۇمكىندىك بەرەدى"، — دەدى الماتى اكىمى دارحان ساتىبالدى.
رەسمي دەرەككە سايكەس، بۇگىندە BYD كومپانياسى 110 مىڭنان استام ەلەكتر اۆتوبۋسىن ءوندىرىپ، الەمنىڭ 400-گە جۋىق قالاسىنا جەتكىزگەن. ولاردىڭ قاتارىندا اقش، ەۋروپا، ازيا، لاتىن امەريكاسى مەن افريكا ەلدەرى بار. قىتايلىق ءوندىرۋشى ءۇشىن ورتالىق ازيا ءوڭىرى، ونىڭ ىشىندە قازاقستاننىڭ قولايلى ينۆەستيسيالىق احۋالى مەن ەكولوگيالىق باستامالارعا دەگەن سۇرانىسى ۇلكەن قىزىعۋشىلىق تۋدىرىپ وتىر.
الماتىدا BYD ەلەكتروبۋستارىن ءوندىرۋ ەلىمىزدىڭ جاسىل ەكونوميكانى دامىتۋ مەن تۇراقتى قالالىق كولىك جۇيەسىن قالىپتاستىرۋ جونىندەگى ستراتەگيالىق ماقساتىن جۇزەگە اسىرۋ جولىنداعى ماڭىزدى قادام بولماق.