2 مىڭ كوشە تازارتىلىپ، 600 قوقىس جاشىگى ورناتىلدى، 302 زاڭسىز دۇڭگىرشەك ءسۇرىلدى: «الماتى – ءبىزدىڭ ورتاق ءۇيىمىز» ناۋقانىنىڭ العاشقى اپتاسى قالاي ءوتتى؟
الماتىدا «تازا قازاقستان» رەسپۋبليكالىق باعدارلاماسى اياسىندا ءوتىپ جاتقان «الماتى – ءبىزدىڭ ورتاق ءۇيىمىز» ەكولوگيالىق ناۋقانىنىڭ العاشقى اپتاسى قورىتىندىلاندى، دەپ حابارلايدى aqshamnews.kz
1-9 ناۋرىز ارالىعىندا وتكەن العاشقى اپتا «تازا كوشەلەر» اتاۋىمەن ۇيىمداستىرىلىپ، قالا كوشەلەرىن جاپپاي تازارتۋ، ينفراقۇرىلىمدى رەتكە كەلتىرۋ جانە زاڭسىز ساۋدا نىساندارىن جاپپاي ءسۇرۋ شارالارىنا باعىتتالدى.
ءبىر اپتا ىشىندە ۇزىندىعى 2 777 كم بولاتىن 2 318 كوشە تازارتىلدى، 560 ايالداما پاۆيلونى، 315 باعدارشام نىسانى جانە 1 537 جول بەلگىسى جۋىلىپ، تازالاندى. بۇل جۇمىسقا 100-دەن استام ارنايى تەحنيكا مەن 240 جۇمىسشى جۇمىلدىرىلدى.
اتالعان كەزەڭدە «قاسبەتتەن قاسبەتكە دەيىنگى كەشەندى تازارتۋ» اكسياسى ءوتتى، ونىڭ اياسىندا مەردىگەر ۇيىمدار تازالىق جۇمىستارىن جۇرگىزدى. وعان كەزدەيسوق قوقىستار مەن بۇتاقتاردى جيناۋ، قار تازالاۋ، ارىق جۇيەسىن تازارتۋ، جول جيەكتەرىن سىپىرۋ، جاياۋ جۇرگىنشىلەر جولدارى مەن كوشەلەردى تازارتۋ جۇمىستارى كىردى.
سونىمەن قاتار، اۋدان اكىمدىكتەرى كاسىپكەرلىك سۋبەكتىلەرىمەن كورىكتەندىرۋ قاعيدالارى اياسىندا بەكىتىلگەن ۋچاسكەلەردىڭ سانيتارلىق جاعدايىن ساقتاۋ قاجەتتىلىگى تۋرالى ءتۇسىندىرۋ جۇمىستارىن جۇرگىزدى. سونىڭ ناتيجەسىندە كورىكتەندىرۋ بويىنشا 284-كە جۋىق ءتولقۇجات راسىمدەلدى.
قالاداعى سانيتارلىق جاعدايدى جاقسارتۋ ماقساتىندا كوممۋنالدىق ينفراقۇرىلىمدى دامىتۋ باسقارماسى كولەمى 120 ليترگە دەيىنگى 600-دەن استام ۆانداليزمگە ءتوزىمدى قوقىس جاشىگىن ورناتتى. جالپى، 2025 جىلى قالادا 80 جانە 120 ليترلىك 12 036 جاڭا قوقىس جاشىگىن ورناتۋ جوسپارلانىپ وتىر.
ايتا كەتەيىك، 2025 جىلدىڭ 4 اقپانىنان باستاپ الماتىدا كوشە ساۋداسىن جويۋ باعدارلاماسى قىزۋ ءجۇرىپ جاتىر. بۇگىنگى كۇنگە دەيىن 302 زاڭسىز ساۋدا نىسانى جانە 222 ويىن اۆتوماتى (كۇش ولشەۋىش) ءسۇرىلدى. باعدارلاما 15 ناۋرىزعا دەيىن جالعاسادى.
ناۋقان اياسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ قىزمەتكەرلەرى «جاقىنىڭا جاردەمدەس» اكسياسىن وتكىزدى. اكسيا بارىسىندا ەرىكتىلەر قاريالاردىڭ اۋلاسى مەن ىرگەلەس اۋماقتى قار مەن قوقىستان تازالاپ، ازداعان جوندەۋ جۇمىستارىن جۇرگىزدى.
ەكولوگيا جانە قورشاعان ورتا باسقارماسى ارنايى ۇيىمدارمەن بىرلەسىپ، «تازا اۋا» اكسياسى اياسىندا 19 ستاسيونارلىق جانە 3 ءموبيلدى ەكولوگيالىق بەكەتتە اۆتوكولىك شىعارىندىلارىن باقىلاۋ جۇمىستارىن كۇشەيتتى.
«ءقاۋىپسىز جول» اكسياسى اياسىندا ماگيسترالدەردى كورىكتەندىرۋ، جول جابىندارىن جوندەۋ جانە جول تاڭبالارىن جاڭارتۋ جۇمىستارى باستالدى. ءبىرىنشى اپتادا 1،2 مىڭ م² جولعا شۇڭقىرلى جوندەۋ جۇرگىزىلىپ، نوسەرلى كارىز جۇيەسىنە ارنالعان 24 جاڭبىر قابىلداعىش ورناتىلدى.
ايتا كەتەيىك، 11 ناۋرىزدان باستاپ ناۋقاننىڭ ەكىنشى كەزەڭى – «تازا ساياباقتار مەن سكۆەرلەر» باستالدى. بۇل كەزەڭدە وزەن جاعالاۋلارىن، ساياباقتار مەن سكۆەرلەردى، قوعامدىق كەڭىستىكتەردى تازارتۋ جۇمىستارى جۇرگىزىلەدى. جالپى، ناۋقان 1 ساۋىرگە دەيىن جالعاسادى. وسى ۋاقىت ارالىعىندا بۇكىل قالالىق ينفراقۇرىلىمدى رەتكە كەلتىرۋ، 4 مىڭنان استام اۋلا اۋماعىن تازارتۋ، 445 ساياباق پەن سكۆەردى جيناۋ، وزەن جاعالاۋلارىن تازارتۋ، 12 مىڭعا جۋىق كوشەدەگى ۆانداليزمگە ءتوزىمدى قوقىس جاشىگىن ورناتۋ، 600-دەن استام زاڭسىز ساۋدان نىساندارىن ءسۇرۋ، 5 مىڭ اعاش پەن بۇتا وتىرعىزۋ جوسپارلانعان.
تولىق اقپارات Almaty.kz سايتىندا جاريالانادى.