2025 جىلى الماتى بيۋدجەتىنىڭ 40%-ى الەۋمەتتىك سالاعا باعىتتالادى
الماتى ءماسليحاتى 2025-2027 جىلدارعا ارنالعان بيۋدجەتتى بەكىتتى. قۇجاتقا سايكەس، كەلەسى جىلى الماتىدا الەۋمەتتىك سالاعا 851،9 ملرد تەڭگە قاراستىرىلعان، بۇل قالا بيۋدجەتى شىعىندارىنىڭ شامامەن 40%-ى. وسىلايشا، 2025 جىلى الەۋمەتتىك سالاعا بولىنەتىن قارجى 15%-عا ارتادى. 2024 جىلى الەۋمەتتىك سالاعا 741،2 ملرد تەڭگە، ال 2023 جىلى 664،5 ملرد تەڭگە بولىنگەن ەدى.
بۇل سومانىڭ ىشىندە دەنساۋلىق ساقتاۋ سالاسىنا 55،8 ملرد تەڭگە ءبولىندى.
2025 جىلى دەنساۋلىق ساقتاۋ ينفراقۇرىلىمىن جاڭعىرتۋعا بولىنەتىن قارجى 15%-عا ۇلعايتىلادى. سونداي-اق، 1326 دارىگەر مەن مەديسينا قىزمەتكەرلەرىن ءۇش دەڭگەيلى وقىتۋ باعدارلاماسىن ىسكە اسىرۋ جالعاسادى.
جاڭا بيۋدجەتتىڭ ءبىر بولىگى №4 جەدەل مەديسينالىق جاردەم قوسالقى ستانسياسىنىڭ، ەكى وتباسىلىق-دارىگەرلىك امبۋلاتوريانىڭ جانە بوستاندىق اۋدانىنداعى كۇنىنە 500 ادام قابىلدايتىن جاڭا ەمحانانىڭ قۇرىلىسىن اياقتاۋعا جۇمسالادى. قالالىق مەديسينالىق مەكەمەلەر قاجەتتى دارى-دارمەكپەن جانە جابدىقتارمەن، سونىڭ ىشىندە ۆاكسينالار مەن يممۋنوپروفيلاكتيكاعا ارنالعان پرەپاراتتارمەن قامتاماسىز ەتىلەدى.
سيرەك كەزدەسەتىن اۋرۋلارى بار 4 مىڭنان استام پاسيەنت تەگىن دارى-دارمەكپەن قامتاماسىز ەتىلەدى. 2025 جىلى جەدەل جاردەم اۆتوپاركىن جاڭارتۋ جالعاسادى، بۇل ماقساتتا 50 كولىك ساتىپ الۋ جوسپارلانۋدا. سونىمەن قاتار، 2024-2025 جىلدارى 20 دەنساۋلىق ساقتاۋ نىسانىن كۇردەلى جوندەۋ كوزدەلگەن، ونىڭ 10-ىن 2025 جىلى اياقتاۋ جوسپارلانۋدا. دەنساۋلىق ساقتاۋ سالاسىنداعى 30 جاڭا جانە ەسكىرگەن نىساندى جوبالاۋ جۇمىستارى دا جالعاسۋدا.