30 شىلدە كۇنى الماتى — بەيجىڭ باعىتىنداعى جاڭا تىكەلەي رەيس اشىلدى. بۇل رەيستى Air China اۋە كومپانياسى جۇزەگە اسىرادى. اشىلۋ راسىمىنە جۇڭگو حالىق رەسپۋبليكاسىنىڭ الماتىداعى باس كونسۋلى سزيان ۆەي حانىم، الماتى قالاسى تۋريزم باسقارماسىنىڭ باسشىسى عاليا توقسەيىتوۆا، سونداي-اق، الماتى حالىقارالىق اۋەجايى مەن اۋە كومپانيا وكىلدەرى قاتىستى، دەپ حابارلايدى اqshamnews.kz.
Air China — قىتايدىڭ مەملەكەتتىك اۋە كومپانياسى جانە ۇلتتىق اۋە تاسىمالداۋشىسى، باس كەڭسەسى بەيجىڭ قالاسىندا ورنالاسقان. كومپانيا الەمدىك Star Alliance اۋە اليانسىنىڭ مۇشەسى جانە قىتايداعى ەڭ ءىرى اۋە تاسىمالداۋشىلاردىڭ ءبىرى.
تىكەلەي رەيستىڭ اشىلۋى ەكى ەل اراسىنداعى ستراتەگيالىق ارىپتەستىكتى ودان ءارى نىعايتۋعا، ءوزارا تۋريستىك جانە ىسكەرلىك ساپارلاردىڭ ارتۋىنا، سونداي-اق، ءتۇرلى سالادا تاجىريبە مەن ينۆەستيسيا الماسۋعا ىقپال ەتەدى. 2025 جىلدىڭ ءبىرىنشى توقسانىندا الماتىعا قىتايدان 20 952 تۋريست كەلگەن، بۇل وتكەن جىلدىڭ وسى كەزەڭىمەن سالىستىرعاندا 39،9% كوپ.
قازىرگى تاڭدا الماتى قىتايدىڭ گۋانچجوۋ، سيان، ءۇرىمجى، شانحاي، حانچجوۋ جانە سانيا قالالارىمەن تىكەلەي اۋە رەيستەرى ارقىلى بايلانىسقان. جاڭا رەيس قازىرگى باعىتتاردى تولىقتىرىپ، ەكى ەل اراسىنداعى رەيستەر جيىلىگىن ارتتىرادى. قازىرگى ۋاقىتتا اي سايىنعى رەيستەر سانى 150-دەن اسادى.