ق ر پرەمەر-مينيسترى ءاليحان سمايىلوۆ پەن TAV Airports Holding كومپانياسىنىڭ پرەزيدەنتى سەركان كاپتان الماتى اۋەجايىنىڭ جاڭا حالىقارالىق تەرمينالىنىڭ قۇرىلىسىن جانە ەلىمىزدە وزگە دە ينفراقۇرىلىمدىق جوبالاردى ىسكە اسىرۋ ماسەلەلەرىن تالقىلادى.
كەزدەسۋ بارىسىندا ۇكىمەت ەلىمىزدىڭ كولىك-لوگيستيكا الەۋەتىن ارتتىرۋعا ۇلكەن كوڭىل بولەتىنى اتالىپ ءوتتى. سوندىقتان الماتىدا جاڭا حالىقارالىق تەرمينال قۇرىلىسى سىندى ۇلكەن جوبانى جۇزەگە اسىرۋ ستارتەگيالىق ماڭىزعا يە، دەپ حابارلايدى Almaty-akshamy.kz Primeminister.kz-كە سىلتەمە جاساپ.
«ونىڭ اشىلۋى جولاۋشىلار اعىنىن ارتتىرىپ، ۇشۋ گەوگرافياسىن كەڭەيتەدى جانە مەگاپوليس تۇرعىندارى مەن قوناقتارىنا ساپالى قىزمەت پەن جايلىلىقتىڭ جوعارى دەڭگەيىن قامتاماسىز ەتەدى دەپ كۇتەمىز»،— دەدى ءاليحان سمايىلوۆ.
TAV Airports Holding باسشىسى جوبانى ىسكە اسىرۋ بارىسى جونىندە جاڭا اقپاراتپەن ءبولىستى. ونىڭ ايتۋىنشا، بۇگىندە قۇرىلىس جۇمىستارى 87%-عا اياقتالعان. جاڭا تەرمينال بيىلعى ماۋسىمدا اشىلادى دەپ جوسپارلانىپ وتىر.
جالپى بىلتىر الماتى اۋەجايى جولاۋشىلار اعىنىنىڭ رەكوردتىق دەڭگەيىن تىركەدى. قولدانىستاعى تەرمينال تەك ىشكى رەيستەرگە عانا پايدالانىلادى. بۇل رەتتە ەكى تەرمينالدىڭ الەۋەتى جىلىنا 14 ملن جولاۋشىعا جەتەدى. اۋە ايلاعى ارقىلى جۇك تاسىمالى كولەمىن 100 مىڭ تونناعا دەيىن ارتتىرۋ جوسپارلانعان.
پرەمەر-مينيستر الماتى اۋەجايى تەمىرجول جانە اۆتوموبيل تاسىمالىن قوسا العاندا، تولىققاندى مۋلتيمودالدى كولىك-لوگيستيكا حابى رەتىندە دامۋى كەرەك ەكەنىن اتاپ ءوتتى. ينۆەستور الداعى جوسپارلارىندا مۇنى ەسكەرۋى ءتيىس.