جاپپاي تارتىپسىزدىك بويىنشا 72 قىلمىستىق ءىس تىركەلگەن
جاپپاي تارتىپسىزدىك كەزىندە الماتى حالىقارالىق اۋەجايىنا كەلتىرىلگەن شىعىن سوماسى 530 792 668 تەڭگەنى قۇرادى. بۇل سوماعا عيماراتتىڭ ىشىندە ورنالاسقان دۇكەندەرگە، كاسسالارعا، جەكە فيرمالاردىڭ كەڭسەلەرىنە كەلتىرىلگەن زالال دا كىرەدى، دەپ حابارلايدى Almaty-akshamy.kz Turkystan.kz cىلتەمە جاساپ.
ىشكى ىستەر مينيسترلىگى كولىكتەگى پوليسيا دەپارتامەنتى باستىعىنىڭ ورىنباسارى سارىقۇل جولانوۆتىڭ ايتۋىنشا، 3-31 قاڭتار ارالىعىندا جاپپاي تارتىپسىزدىك بويىنشا 72 قىلمىستىق ءىس تىركەلگەن. بۇل، نەگىزىنەن، ۇرلىق پەن توناۋ.
«نارازىلىق اكسيالارى كەزىندە قىلمىستىق ەلەمەنتتەر مەملەكەتتىك ماڭىزى بار نىساندارعا ەكى شابۋىل جاسادى. ولار – الماتى حالىقارالىق اۋەجايى جانە اۋەجايداعى جەلىلىك پوليسيا ءبولىمى. سونىمەن قاتار، اۋەجاي عيماراتىنىڭ ىشىندە ورنالاسقان ساۋدا نىساندارى شابۋىلعا ۇشىرادى. قىلمىس جاساعان 14 كۇدىكتى ۋاقىتشا ۇستاۋ يزولياتورىنا قامالدى»، – دەدى دەپارتامەنت باستىعىنىڭ ورىنباسارى.
كولىك پوليسياسىنىڭ قىزمەتكەرلەرى قىلمىسكەرلەردەن 24،5 ميلليون تەڭگە ۇرلانعان مۇلكىن تاركىلەگەن. ونىڭ ىشىندە ءۇش كولىك، بەس ۇيالى تەلەفون، 2،2 ميلليون تەڭگە جانە 635 مىڭ تەڭگەگە باعالانعان 47 برەندتى كيىم بار.
ءقازىر ءتارتىپ ساقشىلارى قىلمىستىق ىس-ارەكەتتەرگە قاتىسى بار ادامداردى انىقتاۋعا باعىتتالعان جەدەل ىزدەستىرۋ ءىس-شارالارىن جالعاستىرۋدا. پوليسيا جاساقتارى اۋەجايلار مەن ۆوكزالدار اۋماعىن پاترۋلدەيدى. جەلىلىك بولىمشەلەردىڭ ءبىر مىڭنان استام قىزمەتكەرى تاۋلىك بويى قىزمەت اتقارادى.
ايتا كەتسەك، بۇعان دەيىن الماتى قالاسىنىڭ اكىمدىگى 20 اكىمشىلىك عيمارات، پوليسيا دەپارتامەنتىنىڭ 10 بەكەتى، 17 ەكوپوست جانە اۋەجاي عيماراتىنا كەلتىرىلگەن شىعىننىڭ 22،6 ميلليارد تەڭگەدەن اساتىنىن حابارلاعان بولاتىن.