«EXPO-2020 Dubai دۇنيەجۇزىلىك كورمەسىندە قازاقستان رەسپۋبليكاسىنىڭ ۇلتتىق پاۆيلونىندا ۇسىنىلعان «الەم بەينەسى» ارت-جوباسى گيننەستىڭ رەكوردتار كىتابىنىڭ سەرتيفيكاتىنا يە بولدى. سەرتيفيكاتتى سالتاناتتى تاپسىرۋ ءراسىمى قازاقستان پاۆيلونىنىڭ ساحناسىندا ءوتتى»، - دەلىنگەن قازينۆەست كومپانياسى تاراتقان اقپاراتتا.

«الەم بەينەسى» ارت-جوباسى – پاۆيلونعا الەمنىڭ تۇكپىر-تۇكپىرىنەن كەلگەن ادامدار قىلقالام جانە بوياۋلاردىڭ كومەگىمەن ءوز قولتاڭباسىن قالدىرعان جەر پلانەتاسىنىڭ كەنەپتەگى تۇپبەينەسى. كەنەپتىڭ ولشەمى پلانەتامىزدىڭ كىشىرەيتىلگەن فيزيكالىق پارامەترلەرىنىڭ ۇزىندىعى مەن ەنىنە سايكەس كەلەدى. كارتينانىڭ نەگىزگى يدەياسى EXPO-2020 Dubai كورمەسىنىڭ «اقىل-ويدى بىرىكتىرە وتىرىپ، بولاشاقتى قالىپتاستىرۋ» تاقىرىبىمەن ۇندەسەدى. ارت-جوبانىڭ ماقساتى – ءبىزدىڭ عالامشارىمىزدا ءومىر سۇرەتىن ادامداردى ۇلتتىق پاۆيلوننىڭ اۋماعىندا ورنالاسقان ءبىر ونەر تۋىندىسى ارقىلى بىرىكتىرۋ. كارتينا – بەيبىتشىلىك، بىرلىك، ۇيلەسىمدىلىك جانە دوستىق سياقتى قۇندىلىقتاردىڭ نىشانى.

بۇگىنگى تاڭدا الەمنىڭ 193 ەلىنەن كەلگەن 1900-دەن استام پاۆيلون قوناقتارى مەن كەلۋشىلەرى كارتينا بەتىندە وزدەرىنىڭ «ءىزىن» قالدىردى. ولاردىڭ اراسىندا الەمگە تانىمال گولليۆۋد اكتريساسى باي لينگ، امەريكالىق كاسىپقوي بوكسشى روي دجونس، قازاقستاندىق رەجيسسەر تيمۋر بەكمامبەتوۆ، رەسەيلىك ءانشى ۆالەريا، قازاقستاندىق كاسىبي ۆەلوشاباندوز الەكساندر ۆينوكۋروۆ جانە باسقالارى بار.