12 قاڭتاردا دەليدەن الماتىعا كەلگەن رەيستە مەديسينالىق كومەكتى قاجەت ەتەتىن جولاۋشى بولعان. جولاۋشىنى قارسى الۋ ءۇشىن اۋەجايدا ارنايى STCR كومانداسى دايىن تۇرعان. الايدا، قالالىق رەانيموبيل الدىن الا كەلىسىمسىز اۋەجاي اۋماعىنا كىرىپ، كومەك كورسەتۋ پروسەسىن قيىنداتقان. بۇل تۋرالى Aqshamnews.kz سايتى حابارلايدى.
اۋەجاي وكىلدەرىنىڭ ايتۋىنشا، رەانيموبيلدىڭ كەلەتىندىگى تۋرالى الدىن الا حابارلانباعان. حالىقارالىق ەرەجەلەر بويىنشا مۇنداي جاعدايلاردا اقپاراتتى كەمىندە 24 ساعات بۇرىن نەمەسە رەيس قونۋدان 2 ساعات بۇرىن حابارلاۋ قاجەت.
جاعداي قالاي ءوربىدى:
- جولاۋشىنىڭ ءحالى ناشارلاعان سوڭ، اۋەجاي قىزمەتكەرلەرى وزدەرىنىڭ جەدەل جاردەم قىزمەتىن شاقىرعان.
- الايدا جولاۋشىنى ەرتىپ جۇرگەندەر اۋەجايدىڭ جەدەل جاردەمىنەن باس تارتىپ، ونى شەكارا باقىلاۋ ايماعىنا ءوز كۇشتەرىمەن جەتكىزگەن.
- جولاۋشى كەزەكسىز راسىمدەردەن وتكىزىلىپ، قاجەتتى سۇيەمەلدەۋ كورسەتىلگەن.
اۋەجاي اكىمشىلىگى جاعدايعا بايلانىستى وكىنىش ءبىلدىرىپ، ەرەكشە كۇتىمدى قاجەت ەتەتىن جولاۋشىلار ءۇشىن بارلىق جاعداي جاساۋعا دايىن ەكەنىن اتاپ ءوتتى. اۋەجايدا مۇمكىندىگى شەكتەۋلى جولاۋشىلاردى سۇيەمەلدەۋ قىزمەتى بار، ءبىراق ول ءۇشىن الدىن الا حابارلاۋ ماڭىزدى.