اۋە كومپانياسى 31 قاڭتار كۇنى ۆاشينگتون شتاتىنىڭ ەۆەرەتتە زاۋىتىندا سوڭعى «بوينگ-747»ء-نى كليەنتىنە تاپسىردى، دەپ حابارلايدى Almaty-akshamy.kz.
«بوينگ-747»قالاي بولعاندا دا الەمدەگى ەڭ تانىمال ۇشاقتاردىڭ قاتارىندا. ۇشاقتىڭ داۋرەنى 54 جىل بويى دۇرىلدەپ تۇردى، ول اۋە كەڭىستىگىندە 1970 جىلدان بەرى تانىمال.
ءبىر كەزدەرى ءتورت قوزعالتقىشتى لاينەر توڭكەرىس جاساپ، تيىمدىلىكتى ارتتىرىپ، اۋە قاتىناسىن قولجەتىمدى ەتتى. ونىڭ الدىنداعى Boeing-707 189 جولاۋشى تاسىمالداسا، 747 مودەل بىردەن 550 ورىنعا سەرتيفيكاتتالدى، كەيىنىرەك ولاردىڭ سانى 660-قا دەيىن ءوستى. ولاردى ءوندىرۋ ءۇشىن كومپانيا ۆاشينگتون شتاتىندا جەكە زاۋىت سالۋعا ءماجبۇر بولدى.
بۇگىنگى تاڭدا الەمدە وسى ۇلگىدەگى 44 جولاۋشىلار لاينەرى قولدانىستا. جالپى «بوينگ-747» وسى كەزگە دەيىن 3،5 ميلليارد جولاۋشىنى تاسىمالداعان.
ۇشاق ءوندىرىسىنىڭ توقتاۋ سەبەبى، جارتى عاسىردا تەحنيكالىق پروگرەسس دامىپ كەتتى. ءقازىر الەمدە سىيىمدىلىعى جاعىنان ءتورت قوزعالتقىشتى ۇشاقتاردى قۋىپ جەتكەن، ال تيىمدىلىگى جاعىنان ولاردان باس-اياعى اسىپ تۇسەتىن قوس موتورلى ۇشاقتار كوپ. ءبىر قىزىعى، 747ء-نىڭ نەگىزگى باسەكەلەسى، ەۋروپالىق ءتورت قوزعالتقىشتى A380 لاينەرى نەبارى 16 جىل بۇرىن جاسالعانىنا قاراماستان، ول دا ءدال سول سەبەپتى ەندى شىعارىلمايدى.
Boeing قاتارىنداعى جاڭا «فلاگمان» 2020 جىلى العاشقى رەيسىن جاساعان ەكى قوزعالتقىشتى كەڭ فيۋزەلياجدى 777X لاينەرى بولادى.
دەگەنمەن، Boeing-تى جاساپ شىعارۋشىلار قازىرگى قولدانىستاعى ۇشاقتارىنىڭ ءوزى ۇزاق ۋاقىت ۇشاتىنىنا جانە جەكەلەگەن ەكزەمپليارلارى وسى ۇلگىنىڭ 100 جىلدىق مەرەيتويىنا دەيىن جارايتىنىنا سەنىمدى.