ءورت جابىق مۇز ايدىنىنىڭ كىشى زالىنىڭ ءبىرىنشى قاباتىندا سپورتتىق ينۆەنتاردىڭ جانۋىنان شىققانى ءمالىم بولدى.
ءورت ءسوندىرۋ بولىمشەلەرى كەلگەنگە دەيىن عيماراتتاعى بارلىق كەلۋشىلەر مەن قىزمەتكەرلەر ەۆاكۋاسيالانعان.
گاز-تۇتىننەن قورعاۋ قىزمەتىنىڭ ماماندارى ءورت ورنىندا شۇعىل ارەكەت ەتىپ، قۇتقارۋ جۇمىستارىن جەدەل ورىنداپ شىقتى.
توتەنشەلىكتەر ورتكە ورانعان اۋماقتىڭ اۋقىمدىلىعىنا قاراماستان، جالىننىڭ ىرگەلەس بولمەلەرگە تارالۋىنا جول بەرمەگەن. جاعدايدى ويىن باتۋتىنىڭ دا ءبىر مەزەتتە قاتار جانا باستاعانى ودان ءارى قيىنداتتى. ءورت سوندىرۋشىلەردىڭ بىلىكتىلىگى ارقاسىندا ءقاۋىپ دەر كەزىندە تەجەلگەن.
الماتى قالالىق توتەنشە جاعدايلار دەپارتامەنتى باستىعىنىڭ مىندەتىن ۋاقىتشا اتقارۋشى باعدات شايزادا وقيعا ورنىندا جاساعان رەسمي مالىمدەمەسىندە: «2025 جىلدىڭ 25 قاڭتارىندا ساعات 15:16-دا الماتى قالاسىنداعى مۇزدى سارايدا 40 شارشى مەتر اۋماقتا ويىن باتۋتىنىڭ جانۋى تىركەلدى. جەدەل جۇرگىزىلگەن قۇتقارۋ جۇمىستارىنىڭ ناتيجەسىندە 400 ادام ەۆاكۋاسيالاندى، كامەلەتكە تولماعان ءتورت بالا قۇتقارىلدى. ءورت تولىعىمەن ءسوندىرىلىپ، قاۋىپسىزدىك قامتاماسىز ەتىلدى» دەپ حابارلادى.
تجد وكىلدەرى قۇتقارىلعان 4 بالانىڭ ەسىمدەرىن اتادى. ولار: سەرىك سانجار (2013 جىلعى)،سەرىك اسەت (2019)، ىنتىماق بەكسۇلتان (2012) جانە سەرىك ايبار (2016). العاشقى ءۇش بالالاردىڭ جاعدايى قاناعاتتانارلىق، ولار وقيعا بولعان جەردە دارىگەرلەر باقىلاۋىندا. ال سەرىك ايبار قالقامانداعى 1-قالالىق اۋرۋحانانىڭ جانساقتاۋ بولىمىنە جەتكىزىلدى.