الماتى قالاسىنىڭ وڭىرلىك كوممۋنيكاسيالار قىزمەتى الاڭىندا قالا اكىمىنىڭ ورىنباسارى نۇرلان ءابدىراحىمنىڭ قاتىسۋىمەن باسپا ءسوز كونفەرەنسياسى ءوتتى. ءىس-شارادا از قامتىلعان جانە الەۋمەتتىك وسال توپتارعا كورسەتىلەتىن الەۋمەتتىك قولداۋ شارالارى تالقىلاندى.
ومىرلىك قيىن جاعدايدا قالعان وتباسىلاردى انىقتاۋ بويىنشا كەشەندى جۇمىس جۇرگىزىلۋدە. «وتباسىنىڭ سيفرلىق كارتاسى» پلاتفورماسى اياسىندا 1 819 وتباسى (ياعني 9 063 ادام) 755 ملن تەڭگە كولەمىندە اتاۋلى الەۋمەتتىك كومەك الدى.
اكىمنىڭ ورىنباسارىنىڭ ايتۋىنشا، قالانىڭ الەۋمەتتىك ساياساتى تەك قارجىلاي قولداۋعا عانا ەمەس، ازاماتتاردى ەڭبەككە ىنتالاندىرۋعا جانە ءوز وتباسىن وزدىگىنەن قامتاماسىز ەتۋگە باعىتتالعان.
«بيىل مۇگەدەكتىگى بار 33 مىڭنان استام ادام وڭالتۋ قۇرالدارىمەن جانە الەۋمەتتىك قىزمەتتەرمەن قامتىلدى. بۇل ماقساتقا 12،2 ملرد تەڭگە ءبولىندى. سونىمەن قاتار، 277 ادامعا قۇنى 1،3 ملرد تەڭگەنى قۇرايتىن يننوۆاسيالىق تەحنيكالىق قۇرالدار بەرىلدى»، - دەدى نۇرلان ءابدىراحىم.
2026 جىلى الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعىمەن بىرلەسىپ، جەكە وڭالتۋ تەحنيكالىق قۇرالدارىن ىرىكتەۋ جۇيەسىن ەنگىزۋ جوسپارلانۋدا. بۇل جۇيە قىزمەت الۋشىلاردىڭ جەكە ەرەكشەلىكتەرى مەن مەديسينالىق كورسەتكىشتەرىن ەسكەرۋگە مۇمكىندىك بەرەدى.
«ينۆاتاكسي» قىزمەتى دە دامىپ كەلەدى. قارجىلاندىرۋ كولەمىنىڭ ارتۋى ناتيجەسىندە اۆتوپارك 145 كولىككە دەيىن ۇلعايدى. «ياندەكس تاكسي» اگرەگاتورى ارقىلى ىسكە قوسىلعان پيلوتتىق جوبا پايدالانۋشىلار سانىن 2 مىڭنان 3،4 مىڭ ادامعا دەيىن ارتتىردى. 2026 جىلدان باستاپ بۇل قىزمەتتى II جانە III دارەجەلى پسيحيكالىق اۋىتقۋى بار ادامدار دا پايدالانا الادى. قىزمەت ساپاسىن ارتتىرۋ ماقساتىندا وتىنىمدەر مەن باعىتتاردى سيفرلىق تۇردە باقىلايتىن اۆتوماتتاندىرىلعان ديسپەچەرلىك جۇيە ەنگىزىلۋدە.