بۇگىن "قايرات" پەن "رەال مادريد" فۋتبول كلۋبتارى اراسىندا ماڭىزدى ماچ وتەدى. قازاقستاندىق جۇلدىزدار "قايرات" فۋتبول كلۋبىنا قولداۋ ءبىلدىردى. تانىمال تۇلعالار جانكۇيەرلەردى جىگەرلەندىرىپ جاتىر، - دەپ حابارلايدى aqshamnews.kz ءتىلشىسى.
"بۇل - ەل ءۇشىن ماڭىزدى ويىن" - وكتيابر التايەۆ
تانىمال ونەر يەسى وكتەم التايەۆ "قايراتتىڭ" ءار ءماچى ەل نامىسىمەن تىكەلەي بايلانىستى ەكەنىن اتاپ ءوتتى.
"بۇل - ءبىزدىڭ ەل ءۇشىن، الماتى ءۇشىن وتە ماڭىزدى ماچ. ويتكەنى بۇل ويىندى كورۋ ءۇشىن الەمنىڭ تۇكپىر- تۇكپىرىنەن جانكۇيەرلەر اعىلىپ كەلەدى. ءبىز - قوناقجاي حالىقپىز، شەتەلدەن كەلگەن قوناقتارعا تەكتىلىگىمىزدى، مادەنيەتىمىزدى كورسەتەيىك. ءبارىمىز شىن جۇرەكتەن سۇيىكتى كوماندامىز "قايراتقا" قولداۋ بىلدىرەيىك"، - دەدى ول.
ارمان بورانباي: "جاستارعا ۇلگى بولار ءسات"
اكتەر ءارى رەجيسسەر ارمان بورانباي الماتىلىقتاردى قالا تازالىعىن ساقتاۋعا شاقىردى.
"ورتالىق ستاديوندا "قايرات" پەن "رەال مادريد" كەزدەسەدى، بۇل ماچ قالامىزدىڭ تاريحىنا ماڭگىلىككە جازىلاتىنى انىق. قۇرمەتتى الماتىلىقتار مەن شاھار قوناقتارى، الەمگە فۋتبولعا دەگەن قۇشتارلىعىمىزدى عانا ەمەس، ءوز مادەنيەتىمىزدى دە كورسەتەيىك!
قوناقجاي بولايىق، ءارتۇرلى ەلدەردەن كەلگەن جانكۇيەرلەرگە قۇرمەت تانىتايىق. ستاديوندا بولسىن، ءدامحانالار مەن پابتاردا بولسىن – قاي جەردە جۇرسەك تە، الماتى تازالىعى مەن تارتىبىمەن جارقىراۋعا ءتيىس. قالامىزدى تەك قازاقى قوناقجايلىلىعىمىزبەن ەمەس، ءوز ءۇيىمىزدى قادىرلەپ، ايالاۋدى بىلەتىنىمىزبەن دە داڭققا بولەيىك!" - دەدى ول.
"قايراتتىڭ قايتپاسىن، "قايرات!" - نۇرداۋلەت اقىش
جازۋشى نۇرداۋلەت اقىش ءوز الاڭىندا ويناۋدىڭ جاۋاپكەرشىلىگىن ەرەكشە اتاپ ءوتتى.
"ەرتەڭ - قازاق فۋتبولى ءۇشىن عانا ەمەس، قازاق سپورتىنىڭ تاريحىنداعى ايتۋلى بەلەسكە اينالاتىن كۇن. بالاسى اتقا شاپسا، اناسى تاقىمىن قىسادى دەۋشى ەدى. ەرتەڭ ميلليونداعان تاقىمنىڭ قىسىلاتىن كۇنى. جەرلەستەرىمىزە جەڭىس تىلەيمىز. قايراتتىڭ قايتپاسىن، "قايرات!" - دەدى ول.
بولات جۇماعالييەۆ: "فۋتبول – حالىقتى بىرىكتىرەتىن كۇش"
دىنمۇحامەد قونايەۆ حالىقارالىق قورىنىڭ مۇشەسى بولات جۇماعالييەۆ فۋتبولدىڭ الەۋمەتتىك ءرولىن ايرىقشا ايتتى.
"بۇگىن - وتە ماڭىزدى كۇن. ءبىز كەلگەن قوناقتارعا قانداي مادەني ەل ەكەنىمىزدى كورسەتۋىمىز كەرەك. اۋا رايىنا بايلانىستى كيىنىپ شىعۋىڭىزدى ۇمىتپاڭىزدار. ەرتەڭ ءبارى جاقسى بولاتىنىنا ۇمىتتەنەمىن"، - دەيدى ول.
اكەجان كەڭەسوۆ: "الماتى الەم نازارىندا!"
"جەتىسۋ اۋداندىق كوميۋنيتي ورتالىق" جەتەكشىسى، الماتى قالاسىنىڭ قوعامدىق كەڭەسى مۇشەسى اكەجان كەڭەسوۆ كومانداعا سەنىم ءبىلدىردى.
"الماتى - الەم قالاسى! بۇگىن - ءسوزسىز تاريحي وقيعا. الماتى الەم نازارىندا! مىڭداعان تۋريست كەلىپ جاتىر. قۇرمەتتى قازاقستاندىقتار، مادەنيەتتىلىگىمىزدى بارىنشا كورسەتەيىك، ستاديوندا تازالىق ساقتايىق! جىگىتتەرگە ساتتىلىك، العا قايرات!" - دەپ قورىتىندىلادى اكەجان كەڭەسوۆ.
ايتا كەتەيىك، بۇگىن الماتىداعى ورتالىق ستاديوندا "قايرات" فۋتبول كلۋبى مەن "رەال مادريد" اراسىنداعى كوپتەن كۇتكەن كەزدەسۋ 21:45-تە باستالادى.