الماتى الەم نازارىندا: قالادا ينكليۋزيۆ ءبىلىم بەرۋدىڭ WIC 2025 دۇنيەجۇزىلىك كونگرەسى ءوتىپ جاتىر

بۇگىن الماتىدا 15-17 قازان ارالىعىندا وتەتىن ينكليۋزيۆ ءبىلىم بەرۋ جونىندەگى ءبىرىنشى دۇنيەجۇزىلىك كونگرەسس - World Inclusion Congress (WIC 2025) باستالدى. ءىس-شارانى قازاقستان رەسپۋبليكاسىنىڭ وقۋ-اعارتۋ مينيسترلىگى، الماتى قالاسىنىڭ اكىمدىگى، «HOPE» قورى (Help Others Pursue Education، قازاقستان) جانە International Forums of Inclusion Practitioners (IFIP، ۇلىبريتانيا) بىرىگىپ ۇيىمداستىردى.
 
كونگرەسس اياسىندا الەمنىڭ 40 ەلىنەن كەلگەن 1200-دەن استام قاتىسۋشى، مەملەكەتتىك ورگانداردىڭ وكىلدەرى، حالىقارالىق جانە عىلىمي ۇيىمدار، پەداگوگتەر مەن ساراپشىلار، سونداي-اق ينكليۋزيۆتى ءبىلىم بەرۋ سالاسىنداعى كوشباسشىلار باس قوستى.
 
قاتىسۋشىلار اراسىندا ازيا، افريكا، ەۋروپا، سولتۇستىك امەريكا جانە اۆستراليا ەلدەرىنىڭ دەلەگاتتارى بار. 100-دەن استام شەتەلدىك جانە وتاندىق ساراپشى پلەنارلىق جانە پانەلدىك سەسسيالاردا بايانداما جاسايدى.
 
كونگرەستىڭ قۇرمەتتى قوناقتارى قاتارىندا IFIP ۇيىمىنىڭ نەگىزىن قالاۋشى، ينكليۋزيۆتى ءبىلىم بەرۋ سالاسىنداعى ساراپشى دانيەل سوبەل، نوتتينگەم ۋنيۆەرسيتەتىنىڭ پرورەكتورى، ينكليۋزيۆتى ءبىلىم بويىنشا جەتەكشى عالىم ۋمەش شارما، سونداي-اق ايگىلى Fuji Kindergarten بالاباقشاسىنىڭ اۆتورى، جاپون ساۋلەتشىسى تاكاكۋرا تەزۋكا بار.
 
كونگرەستىڭ نەگىزگى تاقىرىبى ءبىلىم بەرۋدەگى يننوۆاسيا، سيفرلاندىرۋ جانە جاساندى ينتەللەكت تەحنولوگياسىن ەنگىزۋ. اسىرەسە، ەرەكشە ءبىلىم بەرۋ قاجەتتىلىگى بار بالالاردى قولداۋعا ارنالعان تەحنولوگيالىق شەشىمدەرگە، وقىتۋدىڭ ساپاسىن ارتتىرۋعا، حالىقارالىق تاجىريبە الماسۋعا جانە ەلدەر اراسىنداعى سەرىكتەستىكتى دامىتۋعا باسا ءمان بەرىلدى. 
 
كونگرەسس اياسىندا Innovation Expo اتتى يننوۆاسيالار كورمەسى اشىلدى. كورمەدە سيفرلىق تەحنولوگيا، ءبىلىم بەرۋ جانە قولجەتىمدى ورتاعا ارنالعان شەشىمدەر ۇسىنىلعان. ءىس-شاراعا قازاقستان، ۇلىبريتانيا، جۇڭگو، اقش، پولشا جانە وڭتۇستىك-شىعىس ازيا ەلدەرىنەن 17 كومپانيا قاتىسىپ جاتىر. كورمە ءۇش كۇن بويى Grand Hall قوناقۇيىندە جانە اشىق پاۆيلونداردا وتەدى.
 
كونگرەستىڭ العاشقى كۇنى «ينكليۋزيۆتى ءبىلىم بەرۋدەگى جاھاندىق ترەندتەر: سىن-تەگەۋرىندەر مەن شەشىمدەر» تاقىرىبىندا دوڭگەلەك ۇستەل جانە بالالاردىڭ پسيحيكالىق ءال-اۋقاتى، ەرەكشە ءبىلىم بەرۋ قاجەتتىلىگىن باعالاۋ سىندى 15 تاقىرىپ بويىنشا پانەلدىك سەسسيالار ۇيىمداستىرىلدى.
 
16-17 قازان كۇندەرى دە كونگرەسس جالعاسادى. وسى كۇندەرى ينكليۋزيۆتى ءبىلىم بەرۋ سالاسىنداعى عىلىمي ۇيىمدار مەن سەرىكتەستەر اراسىندا ىنتىماقتاستىق تۋرالى مەموراندۋمدارعا قول قويۋ جوسپارلانىپ وتىر.
 
الماتى دەكلاراسياسىنىڭ جوباسىن تالقىلاۋعا باسا نازار اۋدارىلادى. ونىڭ قابىلدانۋى ينكليۋزيا سالاسىندا سيفرلىق تەحنولوگيا مەن جاساندى ينتەللەكتتى قولدانۋدا ءبىرىڭعاي حالىقارالىق تاسىلدەردى قالىپتاستىرۋ مەن ىنتىماقتاستىقتى نىعايتۋدىڭ ماڭىزدى قادامى بولماق.
 
كونگرەسس 17 قازاندا سالتاناتتى تۇردە جابىلادى. WIC 2025 ينكليۋزيا مادەنيەتىن دامىتۋعا، بىلىمگە تەڭ قولجەتىمدىلىكتى ىلگەرىلەتۋگە، جاڭا تەحنولوگيا مەن ۇزدىك حالىقارالىق تاجىريبە ەنگىزۋگە جانە حالىقارالىق سەرىكتەستىكتى نىعايتۋعا سەرپىن بەرەدى.