الماتى قالاسىنىڭ اۋەزوۆ اۋدانىندا شارۋاشىلىق نىسانىنان باستالعان ءورت ءۇش قاباتتى عيماراتتىڭ شاتىرىن شارپىدى. قازىرگى ساتتە ءورت تولىق ءسوندىرىلدى، دەپ حابارلايدى Aqshamnews.kz ق ر تجم باسپا ءسوز قىزمەتىنە سىلتەمە جاساپ.
«اۋەزوۆ اۋدانىندا شارۋاشىلىق قۇرىلىستان شىققان ءورت ءۇش قاباتتى عيماراتتىڭ شاتىرىنا تاراعان. قالا قۇتقارۋشىلارى ءتىلسىز جاۋدى دەر كەزىندە اۋىزدىقتادى»، – دەلىنگەن حابارلامادا.
مينيسترلىك مالىمەتىنشە، ءورتتى سوندىرۋگە 32 قىزمەتكەر جانە الماتى تجد-نىڭ 9 ارنايى تەحنيكاسى جۇمىلدىرىلدى. سۋ ۇزدىكسىز بەرىلىپ وتىرعان. وقيعا كەزىندە شاتىردىڭ ءبىر بولىگى وپىرىلىپ تۇسكەن.
قۋانىشقا وراي، زارداپ شەككەندەر جوق. ساعات 11:22-دە ءورت 200 شارشى مەتر اۋماقتا تولىقتاي سوندىرىلگەنى حابارلاندى.