الماتى اكىمى دارحان ساتىبالدى تۇرعىنداردى جەكە ماسەلەسى بويىنشا قابىلدادى. تۇرعىندار الەۋمەتتىك قولداۋ، مەديسينالىق كومەك، ينجەنەرلىك ينفراقۇرىلىم، كورىكتەندىرۋ، كولىك قاۋىپسىزدىگى، تۇرعىن ءۇي ساياساتى جانە جەر قاتىناستارى جانە ت.ب. جايتتاردى كوتەردى.
قالا تۇرعىندارىنا جەڭىلدىكتەر الۋ ءتارتىبى، مەديسينالىق قىزمەت كورسەتۋ جانە باسپانا بەرۋ تەتىكتەرى جونىندە زاڭنامالىق تۇسىنىكتەمە بەرىلدى.
وتىنىشتەردىڭ باسىم بولىگى ينجەنەرلىك جەلىلەرگە، سۋ ساپاسىنا، جولدى قالپىنا كەلتىرۋگە، گاز كوممۋنيكاسيالارىنىڭ جاي-كۇيىنە جانە اۋلا ماڭىن اباتتاندىرۋعا قاتىستى بولدى. سونداي-اق، بالالار ويىن الاڭدارىن ورناتۋ جانە قالدىق جيناۋ جۇيەسىن جەتىلدىرۋ جونىندە ۇسىنىستار ايتىلدى.
الماتى اكىمى اتقارىلعان جۇمىستاردىڭ ساپاسىن باقىلاۋدى كۇشەيتۋدى، جول توسەمىن قالپىنا كەلتىرۋدى جەدەلدەتۋدى جانە ءبىرقاتار اۋداندا قوسىمشا جەراستى كونتەينەرلەرىن ورناتۋدى تاپسىردى. كولىك قاۋىپسىزدىگىنە بايلانىستى تۇرعىنداردىڭ رەتتەلەتىن جۇرگىنشى وتكەلدەرىنە قاتىستى وتىنىشتەرى دە قارالدى. بۇل جوبالار 2026 جىلعا ارنالعان جوسپارعا ەنگىزىلدى.
سونىمەن قاتار باس جوسپاردى تۇزەتۋ، جەر تەلىمدەرىنىڭ جالداۋ مەرزىمىن ۇزارتۋ، مەملەكەت قاجەتىنە جەر الۋ راسىمدەرى سىندى قالا قۇرىلىسى ساياساتىنا قاتىستى جايتتار دا تالقىلاندى.
قابىلداۋ قورىتىندىسى بويىنشا قالا باسشىسى شەشىمىن كۇتكەن جەدەل ماسەلەلەردى ءتيىستى باسقارمالارعا تاپسىردى، بارلىق ءراسىمنىڭ اشىق ءارى تۇسىنىكتى بولۋىن جانە بەرىلگەن تاپسىرمالاردىڭ ورىندالۋىن قاتاڭ باقىلاۋدا ۇستاۋدى جۇكتەدى. دارحان ساتىبالدى تۇرعىندارمەن اشىق ديالوگ – قالالىق ورتانى جاقسارتۋدىڭ نەگىزگى تەتىگى ەكەنىن اتادى.
ايتا كەتەيىك، ازاماتتاردى جەكە ماسەلەسى بويىنشا قابىلداۋ تۇراقتى تۇردە وتكىزىلەدى. الماتى اكىمى اۋدان تۇرعىندارىمەن ۇدايى كەزدەسىپ، جوبالاردىڭ ورىندالۋ بارىسىن جەرگىلىكتى جەردە باقىلايدى.