الماتى وبلىسىندا ەكى ادامنىڭ ولىمىمەن اياقتالعان جول اپاتى تەرگەلىپ جاتىر، دەپ حابارلايدى Aqshamnews ءتىلشىسى.
الماتى وبلىستىق پوليسيا دەپارتامەنتىنىڭ مالىمەتىنشە، «الماتى – وسكەمەن» اۆتوجولىنىڭ 94-شاقىرىمىندا بولعان جول-كولىك وقيعاسى بويىنشا قىلمىستىق ءىس تىركەلگەن.
الدىن الا دەرەكتەرگە سايكەس، Changan كولىگىنىڭ جۇرگىزۋشىسى رولگە يە بولا الماي، وزىمەن ءبىر باعىتتا كەلە جاتقان جۇك كولىگىنىڭ تىركەمەسىنە سوقتىعىسقان. سوققىدان كەيىن كولىك ينەرسيامەن جول جيەگىندەگى قورشاۋعا سوعىلعان.
«ارتىنشا Toyota Estima كولىگى Changan-عا سوعىلىپ، كەيىن ينەرسيامەن جول جيەگىندە تۇرعان تىركەمەگە سوقتىعىسقان. سونىمەن قاتار، سوققى سالدارىنان Changan كولىگىنىڭ قوزعالتقىشى قارسى جولاققا ۇشىپ، سول جەردە كەلە جاتقان Ford Focus اۆتوكولىگىمەن جاناسقان. جول اپاتىنىڭ ناتيجەسىندە Changan-داعى ەكى جولاۋشى وقيعا ورنىندا كوز جۇمدى. ال اتالعان كولىكتىڭ جۇرگىزۋشىسى مەن Toyota Estima جۇرگىزۋشىسى ءتۇرلى جاراقاتتارمەن مەديسينالىق مەكەمەگە جەتكىزىلدى. ءقازىر وقيعانىڭ بارلىق ءمان-جايىن انىقتاۋ ءۇشىن جان-جاقتى، تولىق ءارى وبەكتيۆتى تەرگەۋ ءجۇرىپ جاتىر»، — دەلىنگەن پوليسيا مالىمدەمەسىندە.