الماتىدا تەلەكوممۋنيكاسيا جانە ماشينا جاساۋ كوللەدجىنىڭ جاڭا وقۋ كورپۋستارى مەن جاتاقحاناسى سالىندى. قالا اكىمى دارحان ساتىبالدى جۇمىس ساپارى اياسىندا ءبىلىم بەرۋ ۇيىمىنا بارىپ، وقۋ ۇدەرىسىنىڭ ۇيىمداستىرىلۋىمەن تانىستى.
كوللەدج تەلەكوممۋنيكاسيا جانە ماشينا جاساۋ سالاسى ءۇشىن بىلىكتى مامان دايارلايدى. وقۋ قازاق جانە ورىس تىلىندە وتەدى. دۋالدى وقىتۋ جۇيەسى مەن مودۋلدىك-قۇزىرەتتىلىك ءتاسىل قولدانىلىپ، تەوريا مەن تاجىريبە ۇشتاسىپ، ەڭبەك نارىعىنىڭ تالاپتارىنا ساي مامان دايارلاۋعا مۇمكىندىك بەرەدى.
كوللەدجدىڭ جوبالىق قۋاتى — 1 050 ستۋدەنت. ونىڭ ىشىندە 340 ستۋدەنت كوللەدجدە تىكەلەي (ەكى اۋىسىمدا) ءبىلىم السا، قالعاندارى كاسىبي داعدىلاردى سالالىق كاسىپورىندار بازاسىندا وندىرىستىك تاجىريبە بارىسىندا مەڭگەرەدى.
بەس بلوكتان تۇراتىن كەشەن 1940 جىلدارى سالىنعان ەسكى عيماراتتاردىڭ ورنىنا بوي كوتەرگەن. كوللەدج ينفراقۇرىلىمىندا جالپى ءبىلىم بەرەتىن پاندەرگە ارنالعان 17 وقۋ كابينەتى، 17 مامانداندىرىلعان كابينەت، 6 وقۋ شەبەرحاناسى جانە 2 زەرتحانا بار. ءبىلىم الۋشىلاردىڭ جان-جاقتى دامۋى ءۇشىن سپورت زالى، ءماجىلىس زالى جانە 200 ورىندىق اسحانا قاراستىرىلعان. جۇمىس ىستەيدى. كوللەدج اۋماعىندا 118 ورىندىق جاتاقحانا بار.
سونداي-اق عيماراتتا اكىمشىلىك كابينەتتەر، مەديسينالىق پۋنكت، كىتاپحانا جانە وقۋ زالى ورنالاسقان. اۋماق كورىكتەندىرىلىپ، كوگالداندىرىلعان، سپورت الاڭدارى بار. عيمارات پەن وعان ىرگەلەس اۋماق تولىقتاي مۇمكىندىگى شەكتەۋلى ازاماتتارعا قولجەتىمدى.
كوللەدج باسشىلىعىنىڭ ايتۋىنشا، ەڭبەك نارىعىندا اۆتوسلەسار ماماندارى مەن لوگيستيكا سالاسىنداعى كادرلارعا سۇرانىس جوعارى.
«مەملەكەت باسشىسى اتاپ وتكەندەي، ەلىمىزدىڭ الەۋەتىن ەسكەرە وتىرىپ، قازاقستان ەۋرازيانىڭ نەگىزگى لوگيستيكالىق حابىنا اينالۋعا ءتيىس. سوندىقتان بىلىكتى ماماندار دايارلاۋ اسا ماڭىزدى. قالا ساپالى كاسىبي ءبىلىم مەن پراكتيكالىق دايىندىققا بارلىق جاعداي جاسالعان زاماناۋي وقۋ ورنىن سالۋعا قارجى ءبولدى. ءبىز زاماناۋي تالاپتارعا ساي كادر دايارلاۋ باعدارلامالارى مەن ءبىلىم بەرۋ ينفراقۇرىلىمىن ودان ءارى دامىتامىز»، — دەدى دارحان ساتىبالدى.
سونىمەن قاتار جۇمىس ساپارى اياسىندا الماتى اكىمى توزىعى جەتكەن تۇرعىن ۇيلەردى قايتا جاڭارتۋ باعدارلاماسى بويىنشا سالىنىپ جاتقان كوپپاتەرلى تۇرعىن ۇيلەردىڭ قۇرىلىس بارىسىن تەكسەردى.
اتاپ ايتقاندا، تۇركسىب اۋدانىنداعى التاي-2 شاعىناۋدانىندا ينۆەستور 57 قامىس قابىرعالى ءۇيدى ءسۇرىپ، ونىڭ ورنىنا 47 جاڭا تۇرعىن ءۇي سالۋدى جوسپارلاپ وتىر. بۇگىنگى تاڭدا 6 ەسكى ءۇي ءسۇرىلىپ، 48 مەنشىك يەسى كومپانيانىڭ ءوز قونىستاندىرۋ قورى ەسەبىنەن جاڭا باسپاناعا كوشىرىلدى. جالپى، 2025 جىلدىڭ قورىتىندىسى بويىنشا توزىعى جەتكەن تۇرعىن ۇيلەردى جاڭعىرتۋ باعدارلاماسى اياسىندا الماتىدا 670 مەنشىك يەسى جاڭا پاتەرلەرگە قونىستاندى.