قازاقستاننىڭ حالىق ءارتيسى ءاسانالى ءاشىموۆ 85 جاسقا تولدى
قالا باسشىسى ەربولات دوسايەۆ مەملەكەت باسشىسىنىڭ تاپسىرماسى بويىنشا اتى اڭىزعا اينالعان اكتەر، قازاقستاننىڭ حالىق ءارتيسى، قازاقستاننىڭ ەڭبەك ەرى ءاسانالى ءاشىموۆتى 85 جىلدىق مەرەيتويىمەن قۇتتىقتادى. الماتى اكىمى ارتىسكە پرەزيدەنت قاسىم-جومارت توقايەۆ پەن مەملەكەتتىك حاتشى ەرلان ءقاريننىڭ قۇتتىقتاۋىن جەتكىزدى. ءاسانالى ءاشىموۆ قۇتتىقتاۋلار مەن ىزگى تىلەكتەردى جاقىندارىنىڭ ورتاسىندا قابىلدادى.
كەزدەسۋ بارىسىندا قالا اكىمى ءارتىستىڭ تەاتر ونەرى مەن كينەماتوگرافتىڭ دامۋىنا قوسقان زور جەكە ۇلەسىن اتاپ ءوتتى. ەڭ جارقىن جانە ەستە قالارلىق رولدەردى اكتەر وتاندىق كينونىڭ التىن قورىنا ەنگەن «قىز جىبەك»، «اتاماننىڭ اقىرى»، «ءترانسسىبىر ەكسپرەسى»، «جاۋشى» جانە ت.ب. فيلمدەردە سومدادى.
«ءسىزدى مەرەيتويىڭىزبەن ەرەكشە قۇرمەتپەن قۇتىقتايمىن. ءسىز شىن مانىسىندە بۇكىلحالىقتىق سۇيىسپەنشىلىككە لايىقسىز. ءبىزدىڭ بىرنەشە ۇرپاعىمىز ءسىزدىڭ فيلمدەرىڭىزدە ءوستى. ءسىز وتاندىق كينو تاريحىندا ەرەكشە ورىن الاسىز. بۇگىن ونەر سالاسىنداعى باستامالار مەن جوبالاردى قولدايسىز جانە ىلگەرىلەتەسىز، جاستارعا ءتالىم بەرىپ، ەلىمىزدى شەت ەلدەردە دارىپتەيسىز»، – دەدى ەربولات دوسايەۆ اتى اڭىزعا اينالعان اكتەرگە ۇزاق ءومىر جانە شىعارماشىلىق جەتىستىكتەر تىلەدى.
قازىرگى ۋاقىتتا ءاسانالى ءاشىموۆ بەلسەندى جۇمىسىن جالعاستىرىپ، قازاقستان تەاترلارى قاۋىمداستىعىن باسقارادى، م.اۋەزوۆ اتىنداعى مەملەكەتتىك اكادەميالىق تەاتردىڭ، سونداي-اق «قازاقفيلم» كينوستۋدياسىنىڭ كوركەمدىك جەتەكشىسى.
ءاسانالى ءاشىموۆتىڭ مەرەيتويىنا ارنالعان سالتاناتتى ءىس-شارا 2022 جىلعى 27 مامىردا اباي اتىنداعى مەملەكەتتىك وپەرا جانە بالەت تەاترىندا وتەدى. شارا بارىسىندا تەاتر جانە كينو شەبەرلەرىنە العاش رەت «ءاسانالى» سىيلىعى تابىس ەتىلەدى.