الماتى قالاسىنىڭ اكىمى دارحان ساتىبالدى كەزەكتى جۇمىس ساپارى اياسىندا كارىزدىك تازارتۋ قۇرىلىستارىن (كتق) جانە «سوربۇلاق» شايىندى سۋلار جيناعىشىن ارالاپ كورىپ، نىسانداردىڭ قازىرگى جاي-كۇيىمەن جانە ولاردى جاڭارتۋ مەن تازارتۋ جۇيەلەرىنىڭ تيىمدىلىگىن ارتتىرۋعا باعىتتالعان شارالارمەن تانىستى.
العاشقى نۇكتە ىلە اۋدانىنداعى جاپەك باتىر اۋىلىندا ورنالاسقان اەراسيا ستانسياسى بولدى. مۇندا الماتى مەن قالا ماڭىنداعى ەلدى مەكەندەردەن كەلەتىن شايىندى سۋلار مەحانيكالىقتان باستاپ بيولوگيالىققا دەيىنگى كوپ ساتىلى تازارتۋدان وتەدى. نىسان 1992 جىلى سالىنعان جانە بۇگىنگى كۇنى قالالىق ينفراقۇرىلىمنىڭ ماڭىزدى بۋىنى بولىپ سانالادى. جوبالىق قۋاتى تاۋلىگىنە 640 مىڭ تەكشە مەتر، قازىرگى جۇكتەمە شامامەن 450 مىڭ تەكشە مەتر.
ساپار بارىسىندا قالا اكىمى تازارتۋ قۋاتتارىن جاڭعىرتۋ قارقىنى قالا قۇرىلىسى مەن ونەركاسىپتىڭ دامۋىنا ساي بولۋى ءتيىس ەكەنىن اتاپ ءوتتى.
«شايىندى سۋلاردى تازارتۋ ساپاسى قالانىڭ ەكولوگيالىق قاۋىپسىزدىگىنە جانە تۇرعىنداردىڭ دەنساۋلىعىنا تىكەلەي اسەر ەتەدى. مۇندا تەك قولدانىستاعى قۋاتتاردى ۇستاپ تۇرۋ عانا ەمەس، تازارتۋ ستاندارتتارىن كوتەرۋ دە ماڭىزدى»، — دەدى دارحان ساتىبالدى.
تازارتۋدان وتكەن سۋ 1973 جىلدان بەرى شايىندى سۋلاردى جيناپ، ساقتاۋعا ارنالعان وڭىردەگى ەڭ ءىرى ينفراقۇرىلىم نىسانى «سوربۇلاق» جيناعىشىنا قۇيىلادى. سۋ ايدىنىنىڭ اۋدانى 58 شارشى شاقىرىم، تەرەڭدىگى 25 مەترگە دەيىن جەتەدى.
«سوربۇلاقتىڭ» جاعدايىن باقىلاۋ اياسىندا نىساندا ينجەنەرلىك-گيدرولوگيالىق زەرتتەۋلەر جۇرگىزىلۋدە. بەكىتىلگەن تەحنولوگيالىق رەگلامەنت پەن پايدالانۋ ەرەجەلەرىنە سايكەس «الماتى سۋ» مكك ماماندارى كۇن سايىن سۋ دەڭگەيىن ولشەپ، تۇراقتى ەكولوگيالىق جانە حيميالىق باقىلاۋ جۇرگىزەدى. سونداي-اق، نىساندا سۋ دەڭگەيىن رەتتەيتىن جانە سۋ تاسقىنى ءقاۋپىنىڭ الدىن الاتىن بوگەتتەر، سۋ بولگىش جانە گيدروتەحنيكالىق قۇرىلىستار بار.
ساپار قورىتىندىسى بويىنشا دارحان ساتىبالدى تازارتۋ قۇرىلىستارىن جاڭعىرتۋ جانە جيناعىشتى سەنىمدى پايدالانۋ بويىنشا جوبالىق شەشىمدەردى باقىلاۋعا الۋدى تاپسىردى. اسىرەسە، تازارتۋ ساپاسىنا، ءسۇزۋ دەڭگەيىنە جانە حالىق سانىنىڭ ارتۋى مەن قالالىق اگلومەراسيانىڭ كەڭەيۋى جاعدايىندا جۇكتەمەنىڭ وسۋىنە دايىندىققا ەرەكشە نازار اۋدارۋدى مىندەتتەدى.