قاسىم-جومارت توقايەۆ «QazaqGaz» ۇك» اق باسقارما ءتوراعاسى سانجار جاركەشوۆتى قابىلدادى، - دەپ حابارلايدى aqshamnews.kz.
مەملەكەت باسشىسىنا ۇلتتىق كومپانيانىڭ اتقارعان جۇمىسىنىڭ ناتيجەسى تانىستىرىلدى.
پرەزيدەنتكە بۇگىنگى تاڭدا ەلىمىزدەگى گازداندىرۋ دەڭگەيى 62،4 پايىزعا جەتكەنى جونىندە باياندالدى. كەيىنگى ءۇش جىلدا 1،7 ميلليون وتانداسىمىز تابيعي گازدىڭ يگىلىگىن كورە باستادى.
قاسىم-جومارت توقايەۆقا جەتىسۋ وبلىسىنىڭ 66 ەلدى مەكەنىن گازبەن قامتاماسىز ەتەتىن تالدىقورعان – ءۇشارال گاز قۇبىرىنىڭ جەلىلىك بولىگىنىڭ قۇرىلىسى اياقتالعانى تۋرالى ەسەپ بەرىلدى. بۇدان بولەك، قاشاعان كەن ورنىندا سۇيىتىلعان مۇناي گازىن اۋىستىرىپ تيەۋ جانە فراكسيالاۋ زاۋىتىنىڭ قۇرىلىسى، بەينەۋ – بوزوي – شىمكەنت ماگيسترالدىق گاز قۇبىرىنىڭ ەكىنشى جەلىسىن سالۋ جۇمىستارى باستالدى. تۇرىك ينۆەستورى – ESTA كومپانياسىنىڭ قاتىسۋىمەن قۇنى 1،35 ميلليارد دوللار بولاتىن كارباميد زاۋىتىنىڭ جوباسى قولعا الىندى.
سانجار جاركەشوۆتىڭ ايتۋىنشا، رەسەيلىك كوگىلدىر وتىندى قازاقستان ارقىلى وزبەكستانعا تاسىمالداۋ كولەمىنىڭ ارتۋى – سالاداعى ماڭىزدى جەتىستىكتىڭ ءبىرى. سونداي-اق ۇلتتىق كومپانيا باسشىسى ورتا ازيا – ورتالىق ماگيسترالدى گاز قۇبىرىندا جۇرگىزىلىپ جاتقان كۇردەلى جوندەۋ جۇمىستارى جونىندە ايتتى. اتالعان جوبا وڭىرلىك ەنەرگەتيكا سالاسىنداعى ماڭىزدى بۋىن رەتىندە ەلىمىزدىڭ ءرولىن ارتتىرا تۇسەدى.
مەملەكەت باسشىسىنىڭ گازدىڭ رەسۋرستىق بازاسىن دامىتۋعا قاتىستى تاپسىرماسىن ورىنداۋ اياسىندا ءبىرقاتار ستراتەگيالىق كەلىسىمگە قول قويىلدى. ولاردىڭ قاتارىندا «اققۇدىق» جانە «سيەۆەرنىي-2» ۋچاسكەلەرىندەگى جەر قويناۋىن پايدالانۋعا ارنالعان كەلىسىمشارتتار، سونداي-اق CNPC كومپانياسىمەن بىرلەسە «سيەۆەرنىي-1» ۋچاسكەسىندە بارلاۋ جۇمىستارىن جۇرگىزۋ تۋرالى كەلىسىم بار.
بۇدان بولەك، مەملەكەت باسشىسىنا گاز سالاسىندا سيفرلىق شەشىمدەر ەنگىزۋ، سونىڭ ىشىندە NVIDIA جاڭا گرافيكالىق چيپتەرىمەن جۇمىس ىستەيتىن سۋپەركومپيۋتەردى قولدانۋ جوسپارى جايىندا باياندالدى.
كەزدەسۋ سوڭىندا قاسىم-جومارت توقايەۆ الداعى جىلىتۋ ماۋسىمىنا دايىندىققا، ەلىمىزدىڭ گاز سالاسىنداعى الەۋەتىن جوسپارلى تۇردە نىعايتۋعا قاتىستى ءبىرقاتار ناقتى تاپسىرما بەردى.