220 كاسىبي ماماننان قۇرالعان كوماندا الماتى تورىندە دجەننيفەر لوپەستىڭ عالامات شوۋىن جاساپ جاتىر، دەپ حابارلايدى Aqshamnews.kz.
10 تامىزدا الماتى الەمدىك پوپ-مۋزىكانىڭ ورتالىعىنا اينالادى. قالا ستاديونىندا ءانشىنىڭ 2025 جىلعى جازعى Summer تۋرى اياسىندا اۋقىمدى كونسەرت وتەدى.
الاڭدا حالىقارالىق ستاندارتتارعا ساي، كوپدەڭگەيلى، اۋقىمدى ساحنا ورناتىلۋدا: تىك مۇنارالار، كوتەرىلەتىن پلاتفورمالار، اسا ءدال جارىق جانە بەينە جۇيەسى. قويىلىمنىڭ ءار ەلەمەنتى سەكۋند سايىن ەسەپتەلىپ، ءمىنسىز جۇمىس ىستەۋى ءۇشىن ءار ەلدەن جينالعان بىلىكتى مامانداردىڭ ۇيلەسىمدى ەڭبەگىمەن جاسالىپ جاتىر.
«قايرات» فك ويىنى اياقتالعان بويدا ستاديونعا قازاقستاندىق پروكات كومپانيالارىنىڭ جابدىقتارى تيەلگەن بەس جۇك كولىگى كىردى. بار-جوعى ءۇش كۇن ىشىندە، تاۋلىك بويى جۇمىس ىستەي وتىرىپ، 220-دان استام تەحنيكالىق مامان — مونتاجشىلار، ينجەنەرلەر، ۇيلەستىرۋشىلەر ەڭبەك ەتىپ جاتىر. ءبىز ساحنانى ورناتۋمەن قاتار، قاۋىپسىزدىك قىزمەتكەرلەرىنە، ەرىكتىلەرگە، بيلەت ساتۋشىلارعا نۇسقاۋلىق وتكىزىپ جاتىرمىز. بۇل اۋقىمى مەن ورىندالۋ جىلدامدىعى جاعىنان كوماندالىق جەڭىس بولعان جوبا. ءتىپتى، الەمدىك تۋردىڭ تەحنيكالىق ديرەكتورى دا ءبىزدىڭ جۇمىس ىرعاعىمىزعا تاڭدانىس ءبىلدىردى»، — دەدى First Media Group ديرەكتورى ءالفيا نۇرعۇماروۆا.
ۇيىمداستىرۋشىلار قالا قىزمەتتەرىمەن بىرلەسە وتىرىپ، قاۋىپسىزدىك پەن لوگيستيكانىڭ نەگىزگى قىرلارىن پىسىقتاپ جاتىر. كونسەرت كۇنى ستاديون ايماقتارعا ناقتى بولىنەدى: فان-ايماقتار، لاۋنج-ايماقتار، فۋد-كورتتار، VIP جانە مەديا ايماقتار. قاۋىپسىزدىك پەن جايلىلىقتى قامتاماسىز ەتۋ ءۇشىن مەديسينالىق بريگادالار، توتەنشە جاعداي قىزمەتكەرلەرى جانە ءورت ءسوندىرۋ توپتارى كەزەكشىلىك اتقارادى. كىرۋ قاقپالارىنا مەتاللدەتەكتورلار مەن قول سكانەرلەرى بار 26 باقىلاۋ-وتكىزۋ پۋنكتى ورناتىلادى.
بارلىق ىقتيمال جاعدايعا ارەكەت ەتۋ سەنارييلەرى توتەنشە جاعدايلار دەپارتامەنتى، جەدەل جاردەم، پوليسيا جانە وزگە دە قۇرىلىمدارمەن تىعىز ۇيلەستىرۋدە پىسىقتالىپ جاتىر. ءاربىر قوناقتىڭ ءوزىن ءقاۋىپسىز سەزىنۋى ماڭىزدى.
«كونسەرت بيلەتتەرى تولىق ساتىلىپ كەتتى. ولاردى اقش پەن جاپونيادان باستاپ، ءباا مەن كاناداعا دەيىنگى 35-تەن استام ەلدىڭ كورەرمەندەرى جانە مىڭداعان قازاقستاندىق ساتىپ الدى. مۇنداي حالىقارالىق قىزىعۋشىلىق كونسەرتتى تۋريزم مەن كرەاتيۆتى ەكونوميكانىڭ قۋاتتى درايۆەرىنە اينالدىرىپ، الماتىنىڭ ايماقتىڭ مادەني استاناسى رەتىندەگى مارتەبەسىن نىعايتادى. بۇل جاي كونسەرت ەمەس، قازاقستان ءۇشىن تاريحي ءسات تەحنولوگيا، شەبەرلىك پەن ەنەرگيانىڭ توعىسۋى، ول قالانىڭ جىلناماسىنا التىن ارىپتەرمەن جازىلادى»، — دەپ ءسوزىن تۇيىندەدى ءالفيا نۇرعۇماروۆا.