قارۋ-جاراقتىڭ ءتۇر-تۇرىن ساتىپ كەلگەن قىلمىستىق توپ ۇستالدى

قارۋ-جاراقتىڭ نەگىزگى بولىگى جاقىن شەت ەلدەردەن قالىپتاسقان قۇپيا ارنالار ارقىلى جەتكىزىلىپ تۇرعان

ۇلتتىق قاۋىپسىزدىك كوميتەتى الماتى قالاسىندا زاڭسىز قارۋ اينالىمى ارناسىنىڭ جولىن كەسۋگە باعىتتالعان ارنايى وپەراسيا وتكىزدى. ونىڭ بارىسىندا وسىنى ۇيىمداستىرعان كۇدىكتى مەن ونىڭ كومەكشىلەرى ۇستالدى، دەپ حابارلايدى Almaty-akshamy.kz.

بۇل وپەراسيا الدىندا ۇزاق جەدەل زەردەلەۋ جۇمىسى جۇرگىزىلگەن.

ناتيجەسىندە وق-دارىمەن اتاتىن جانە وزگە دە سۋىق قارۋدى، سونىمەن قاتار ءوق-دارىنىڭ سيرەك كەزدەسەتىن تۇرلەرىن جەتكىزۋ مەن ساتۋ جۇيەلەرى انىقتالىپ، قۇجاتپەن بەكىتىلدى.

قاسكويلەر قۇپيالىق شارالارىن قاتاڭ ساقتاپ، ساۋدالاۋدىڭ قالىپتان تىس ادىستەرىن پايدالانۋ ارقىلى قىلمىستىق ۇيىمنىڭ جۇمىسىن اشكەرەلەۋدى قيىنداتقان.

ۋاقتىلى قابىلدانعان شارالار ناتيجەسىندە قىلمىستىق بيزنەسكە توسقاۋىل قويىلدى.

قارۋ-جاراقتىڭ نەگىزگى بولىگى جاقىن شەت ەلدەردەن قالىپتاسقان قۇپيا ارنالار ارقىلى جەتكىزىلىپ تۇرعان.

زاڭسىز اينالىمنان 12 قارۋ (جەتىلدىرىلگەن تاپانشالار، مىلتىقتار، زاماناۋي جابدىقتالعان قارۋلار)، 2000 اسا ءوق-دارى، سونىمەن قاتار سۋىق قارۋدىڭ بىرنەشە ءتۇرى (ليميت اياسىندا جاسالعان قىمبات پىشاقتار، قانجارلار، قىلىشتار، ءجۇزى جاسىرىلعان قول تاياقتار جانە باسقا) الىندى.

جەدەل تەرگەۋ ءىس-شارالارى جالعاسىپ جاتىر.