الماتىدا مەتروپوليتەننىڭ ءبىرىنشى جەلىسىنىڭ ەكىنشى كەزەڭىندەگى ءۇشىنشى ىسكە قوسۋ كەشەنىنىڭ قۇرىلىسى جالعاسىپ جاتىر. قالا اكىمى دارحان ساتىبالدى جۇمىس ساپارى اياسىندا "قالقامان" مەترو بەكەتى مەن وعان جالعاساتىن توننەلدەردەگى جۇمىس بارىسىمەن تانىستى.
سول جاق ارالىق توننەلدە "ب. مومىش ۇلى" بەكەتىنەن سالىنىپ جاتقان "قالقامان" بەكەتىنە دەيىنگى ارالىقتا رەلستەر توسەۋ تولىق اياقتالدى. توننەل ىشىندە ەلەكترمەن جابدىقتاۋ كابەلدەرى، سۋ قۇبىرى جانە درەناج جۇيەسى تارتىلدى، ينجەنەرلىك جابدىققا ارنالعان كرونشتەيندەر ورناتىلدى. ەندىگى كەزەڭدە بەينەباقىلاۋ، دىبىستىق حابارلاۋ، ءورت جانە قاۋىپسىزدىك دابىل بەرۋ جۇيەلەرىن ورناتۋ جوسپارلانعان. سونىمەن قاتار وڭ جاق پەرەگوندىق توننەلدى قازۋ جۇمىستارى جالعاسىپ كەلەدى: جالپى ۇزىندىعى 1 593 مەتردىڭ 1 285 مەترى جۇرگىزىلدى، 308 مەترى قالدى.
ستانسيانىڭ وزىندە مونوليتتىك قۇرىلىمدار اياقتالۋعا جاقىن، كەرى توپىراق تولتىرۋ جۇرگىزىلىپ جاتىر. ىشكى كەڭىستىكتە ارلەۋ جۇمىستارى، ينجەنەرلىك كوممۋنيكاسيالار تارتۋ جانە جابدىقتى مونتاجداۋعا دايىندىق ءجۇرىپ جاتىر. بارلىق وندىرىستىك وپەراسيالار تاۋلىك بويى اتقارىلادى. جالپى نىساندا 478-دەن استام مامان ەڭبەك ەتۋدە: ونىڭ 149-ى جەراستى جۇمىستارىندا، 329-ى – اشىق الاڭداردا.
دارحان ساتىبالدى بەكىتىلگەن مەرزىمدى قاتاڭ ساقتاۋدىڭ جانە جۇمىستاردىڭ جوعارى ساپاسىن قامتاماسىز ەتۋدىڭ ماڭىزدىلىعىن اتاپ ءوتتى. اكىمنىڭ ايتۋىنشا، "قالقامان" مەترو بەكەتىنىڭ قۇرىلىسى الماتىنىڭ كولىك جۇيەسى ءۇشىن ستراتەگيالىق مانگە يە جانە مەترونىڭ باتىس باعىتتارداعى قولجەتىمدىلىگىن ايتارلىقتاي ارتتىرادى.
قۇرىلىس-مونتاج جۇمىستارى 2026 جىلدىڭ ءبىرىنشى جارتىسىنىڭ اياعىنا دەيىن اياقتاۋ جوسپارلانعان.