الماتى قالاسى اكىمدىگىندە قالا باسشىسى دارحان ساتىبالدىنىڭ توراعالىعىمەن "تازا قازاقستان" ەكولوگيالىق باعدارلاماسىنىڭ جۇزەگە اسىرۋ بارىسىنا ارنالعان جيىن ءوتتى.
دارحان ساتىبالدى سانيتارلىق تازالىق پەن ەكولوگيالىق مادەنيەتتى دامىتۋ قالانىڭ باستى باسىمدىقتارىنىڭ ءبىرى ەكەنىن اتادى. ونىڭ ايتۋىنشا، بۇل باعىتتاعى جۇمىس جۇيەلى تۇردە جۇرگىزىلۋگە ءتيىس. اكىم اسىرەسە تۇرعىنداردىڭ باستاماسىن، جاستار قوزعالىستارىن قولداۋ مەن ەكولوگيالىق بەلسەندىلىكتى كەڭىنەن ناسيحاتتاۋدىڭ ماڭىزىنا توقتالدى.
18-25 قازان ارالىعىندا الماتىنىڭ بارلىق سەگىز اۋدانىندا سەنبىلىك ءوتتى. ءىس-شاراعا مەملەكەتتىك ورگانداردىڭ، كوممۋنالدىق قىزمەتتەردىڭ، بيزنەس قۇرىلىمدارىنىڭ وكىلدەرى مەن بەلسەندى ازاماتتار اتسالىستى. بارلىعى 8 مىڭنان استام ادام جانە 561 ارنايى تەحنيكا جۇمىلدىرىلىپ، 9 مىڭ تەكشە مەتردەن اسا قوقىس شىعارىلدى. سونىمەن قاتار 2،5 مىڭنان استام اعاش – ۇيەڭكى، قاراعاي، شەگىرشىن مەن قاراعان كوشەتتەرى ەگىلدى.
وسى اپتادا "ايۋساي" ۆيزيت-ورتالىعى اۋماعىندا پروكۋراتۋرا جانە ۇلتتىق پارك وكىلدەرى سەنبىلىك وتكىزەدى.
"جاسىل اۋلا" جوباسىنىڭ كۇزگى كەزەڭىندە كوپقاباتتى ۇيلەردىڭ تۇرعىندارىنا 528 كوشەت – 409 اعاش پەن 119 بۇتا تاراتىلدى.
"جاسىل ەل" جاستار ەڭبەك جاساقتارىنىڭ ماۋسىمدىق جۇمىسى قورىتىندىلانىپ، الماتى شتابى رەسپۋبليكا بويىنشا ۇزدىك دەپ تانىلدى. ەڭ بەلسەندى 20 مۇشەسىنە سىيلىقتار بەرىلدى. سونداي-اق، قالادا وتكەن Plastic Hunt اكسياسى بارىسىندا 25 كەلى پلاستيك قالدىق جينالدى. كەلەسى ءىس-شارا قاراشا ايىنىڭ سوڭىندا وتەدى.
جيىن بارىسىندا اكىم تۇرعىنداردىڭ وتىنىشىنە دەر كەزىندە، ساپالى ءارى ناقتى جاۋاپ بەرۋدى، فورمالدى تاسىلگە جول بەرمەۋدى تاپسىردى.
دارحان ساتىبالدى الماتىلىقتاردى تۋعان قالاسىنىڭ تازالىعىن ساقتاۋعا بەلسەنە اتسالىسۋعا شاقىرىپ، كوشە مەن اۋلا، سونداي-اق قوعامدىق ورىننىڭ سانيتارلىق احۋالىنا باقىلاۋدى كۇشەيتۋدى تاپسىردى.