الماتى اكىمى مەن قىتايدىڭ شاندۋن پروۆينسياسى كوممۋنيستىك پارتياسىنىڭ حاتشىسى سەرىكتەستىك تۋرالى كەلىستى، دەپ حابارلايدى Almaty-akshamy.kz
الماتى اكىمى ەربولات دوسايەۆ پەن شاندۋن پروۆينسياسى جۇڭگو كوممۋنيستىك پارتياسى پارتيا كوميتەتىنىڭ حاتشىسى لين ۋ ماشينا جاساۋ، جاڭا تەحنولوگيالار، ساۋدا، تۋريزم مەن اۋىل شارۋاشىلىعىن دامىتۋ سالاسىنداعى ەكىجاقتى ىنتىماقتاستىقتىڭ پەرسپەكتيۆالارىن تالقىلادى.
لين ۋ حابارلاعانداي، شاندۋن مەن الماتىنىڭ ورتاق تۇستارى كوپ. 100 ميلليوننان استام حالقى بار بۇل جۇڭگو پروۆينسياسى ەكونوميكا كولەمى بويىنشا ءۇشىنشى ورىندا جانە قحر-دا ايتارلىقتاي ىقپالعا يە. بىلتىر ءجوو 8،74 ترلن يۋان نەمەسە 1،3 ترلن. دوللار، ءبىرىنشى جارتىجىلدىقتا ءجوو 6،2% - عا ءوستى.
شاندۋندا اۆتوكولىك شينالارى ءوندىرىسى جولعا قويىلعان، جىل سايىن 200 ملن دانادان استامى شىعارىلادى. وڭدەۋشى ونەركاسىپپەن قاتار سوڭعى جىلدارى يننوۆاسيالىق تەحنولوگيالار سالاسى بەلسەندى دامىپ كەلەدى. پروۆينسيادا اۋىل شارۋاشىلىعى مەن تۋريزم دە دامىعان (700-گە جۋىق تۋريستىك ايماق جانە 7 ۇلتتىق قورىق بار). لين ۋ ماشينا جاساۋ، اۋىل شارۋاشىلىعى، «ەۋروپا-ازيا» باعىتىنداعى كونتەينەرلىك پويىزداردى قامتاماسىز ەتۋ سالاسىنداعى بىرلەسكەن جوبالاردى ىسكە اسىرۋعا، سونىمەن قاتار، شاندۋن مەن الماتى اراسىنداعى جاستاردىڭ تاجىريبە الماسۋىنا قولداۋ كورسەتۋگە دايىن ەكەنىن ءبىلدىردى.
ەربولات دوسايەۆ اتاپ وتكەندەي، قازاقستاندى قىتايمەن 1700 كم-دەن استام ورتاق شەكارا، سونىمەن بىرگە، دوستىق پەن ستراتەگيالىق ارىپتەستىكتىڭ سان عاسىرلىق تاريحى بايلانىستىرادى. تۇراقتى قارىم-قاتىناستىڭ ارقاسىندا الماتى قالاسى مەن قحر اراسىنداعى تاۋار اينالىمى بيىلعى 7 ايدا 18،5%-عا ارتىپ، 4،4 ملرد. اقش دوللارىنا جەتتى. بۇگىندە الماتىدا جۇڭگو كاپيتالى تارتىلعان 1،5 مىڭنان استام بىرلەسكەن كاسىپورىن جۇمىس ىستەيدى (قازاقستاندا – 2 650). بىلتىر مەملەكەت باسشىسى قۋاتتىلىعى 90 مىڭ Changan، Chery، Haval قىتايلىق برەندتەرىن شىعاراتىن زاۋىتتىڭ قۇرىلىسىن باستادى. كاسىپورىن 2025 جىلى الماتىنىڭ يندۋستريالدى ايماعىندا اشىلادى. وسىلايشا، الماتىدا اۆتوموبيل كلاستەرى قۇرىلىپ كەلەدى.
مەملەكەت باسشىسىنىڭ قازاقستان حالقىنا جىل سايىنعى جولداۋىندا ايتىلعان جاڭا ەكونوميكالىق ساياساتتىڭ بازالىق باعىتتارىنىڭ ىشىندە وڭدەۋشى ونەركاسىپكە باسا نازار اۋدارىپ، ەكونوميكانى تەرەڭ ءارتاراپتاندىرۋ ايقىندالدى. وسىعان بايلانىستى ينۆەستورلار ءۇشىن «يننوۆاسيالىق تەحنولوگيالار پاركى» ارنايى ەكونوميكالىق ايماعى تارتىمدى بولىپ وتىر، وندا ينۆەستورلارعا جەڭىلدىكتەر مەن ارتىقشىلىقتار كوزدەلگەن.
بۇعان قوسا، قالا باسشىسى الماتىدا ءتۋريزمدى دامىتۋدىڭ باسىمدىعىن اتاپ ءوتتى. جىل باسىنان بەرى تۋريستەر سانى 5 ەسەگە ءوستى، ال الماتىنىڭ شىۇ-نىڭ مادەني استاناسى بولىپ جاريالانۋىنا بايلانىستى بۇل كورسەتكىش ارتا تۇسەدى، سوندىقتان قالادا جاڭا تۋريستىك ونىمدەردى ازىرلەۋ بويىنشا بەلسەندى جۇمىس جۇرگىزىلىپ وتىر.
كەزدەسۋ قورىتىندىسى بويىنشا تاراپتار ءوزارا ىنتىماقتاستىقتى نىعايتۋ جانە ساۋدا-ەكونوميكالىق بايلانىستاردى كەڭەيتۋ تۋرالى كەلىستى.