توتەنشە جاعدايلار ءمينيسترى WhatsAppء-نومىرىن جاريالادى
WhatsApp مەسسەندجەرىندە توتەنشە جاعدايلار ءمينيسترى سىرىم ءشارىپحانوۆتىڭ ۆەدومستۆونىڭ جەكە قۇرامىنا ارنالعان تەلەفون ءنومىرى ىسكە قوسىلدى. مينيسترمەن تىكەلەي بايلانىس جەلىسى 4 قىركۇيەكتە جۇمىسىن باستادى.
«توتەنشە جاعدايلار مينيسترلىگىنىڭ اۋماقتىق بولىمشەلەرىنىڭ، ۆەدومستۆولىق باعىنىستى ۇيىمدارىنىڭ قىزمەتكەرلەرى، سونىمەن قاتار ازاماتتىق قورعاۋ ورگاندارىنىڭ ارداگەرلەرى ءوز سۇراقتارىن + 7 747 651 75 88 ءنومىرى بويىنشا مينيسترگە تىكەلەي جولداي الادى. سۇراق ماسەلەنىڭ تۇپكى نەگىزىن كورسەتەتىن ناقتى جانە تۇسىنىكتى بولۋى قاجەت. حابارلامانى جىبەرگەن كەزدە ءوزى تۋرالى دەرەكتەردى: ءاتى-جونى مەن لاۋازىمىن، تۇرعىلىقتى ءوڭىردى كورسەتۋ ماڭىزدى»، - دەلىنگەن تجم مالىمەتىندە.