ءجاسوسپىرىم قورشاۋدان اسىپ وتپەك بولعاندا ونىڭ اياعىن تەمىر تەسىپ كەتىپ، 20 سانتيمەترلىك ىستىككە ءىلىنىپ قالعان. الماتى قالالىق بالالارعا ارنالعان جەدەل مەديسينالىق كومەك ورتالىعىنىڭ حيرۋرگتەرى بالانى امان الىپ قالدى.
جەدەل جاردەم بريگاداسى بالانى شامامەن كەشكى 21.00-گە قاراي الماتى قالالىق بالالارعا ارنالعان جەدەل مەديسينالىق كومەك ورتالىعىنىڭ شۇعىل حيرۋرگيا بولىمىنە جەتكىزدى. تەمىر ىستىك بالانىڭ وڭ جامباسىن جاراقاتتاعان. اتا-اناسىنىڭ ايتۋىنشا، ءجاسوسپىرىم كورشى اۋلانىڭ قورشاۋىنان وتپەك بولعاندا، ىستىك اياعىنا كىرىپ كەتىپ، باسىمەن تومەن قاراي ءىلىنىپ قالعان.
«قابىلداۋ بولىمىندە حيرۋرگ، تراۆماتولوگ جانە انەستەزيولوگ شۇعىل تەكسەرىپ، ەمحاناعا جاتقىزىلدى. وتا جاساۋ تاكتيكاسى انىقتالدى. حيرۋرگتاردىڭ الدىنجا اياقتان بوگدە دەنەنى الىپ تاستاۋ عانا ەمەس، سونىمەن قاتار، ماڭىزدى تامىرلاردى زاقىمدانۋدان قورعاۋ مىندەتى تۇردى. ولار وتە مۇقيات ارەكەت ەتىپ، ىستىكتى الىپ شىقتى. ءبىز مىندەتىمىزدى ورىندادىق دەپ سانايمىز. وتادان كەيىنگى ءبىرىنشى تاۋلىكتە ناۋقاس ءوزىن جاقسى سەزىنەدى. جاعدايى قاناعاتتانارلىق. جاقىن ارادا بالا ءوز ەركىمەن مەكتەپكە بارادى دەپ ويلايمىن»، - دەپ اتاپ ءوتتى الماتى قالالىق بالالارعا ارنالعان جەدەل مەديسينالىق كومەك ورتالىعىنىڭ قابىلداۋ ءبولىمىنىڭ مەڭگەرۋشىسى مەيرجان كۋرمانالييەۆ.
وتا جاساۋ بريگاداسى: حيرۋرگ - بايدۋللايەۆ نۇربولات بەركينباي ۇلى، نۇروۆ ءادىلجان اريپجان ۇلى، تراۆماتولوگ - تولامەتوۆ فاررۋح نازارماتيۆيچ جانە انەستەزيولوگ - الياحمەتوۆ جانات مۋراتۋلى.