الماتى اكىمى ەربولات دوسايەۆتىڭ حالىقپەن كەزەكتى كەزدەسۋى مەدەۋ اۋدانىندا ءوتتى. قالا باسشىسى اۋداننىڭ دامۋى جانە تۇرعىنداردان تۇسكەن ۇسىنىستار بويىنشا اتقارىلعان جۇمىستار تۋرالى ايتىپ بەردى. كەزدەسۋگە 350-دەن استام ادام كەلدى، دەپ حابارلايدى اlmaty-akshamy.kz.
اۋداندا ينجەنەرلىك جانە كولىك ينفراقۇرىلىمىن جاڭعىرتۋ وزەكتى ماسەلە بولىپ قالا بەرەدى. بۇگىنگى كۇنى شامامەن 6 كم سۋ قۇبىرى جەلىلەرى قايتا جاڭارتىلدى. سورعى ستانسيالارى مەن "دۋمان" شاعىناۋدانىندا 1800 تەكشە مەترگە 2 رەزەرۆۋار سالۋ جۇمىستارى جالعاسۋدا. 2023 جىلى "كولساي"، "سۇلۋساي"، "كومپوت" جانە "كەڭساي" شاعىناۋداندارىندا ۇزىندىعى 62،7 كم سۋ قۇبىرى جانە كارىز جەلىلەرىنىڭ قۇرىلىسى باستالادى.
جول ينفراقۇرىلىمى جانە قاۋىپسىزدىك ماسەلەلەرى بويىنشا جىل باسىنان بەرى 27،2 شاقىرىم جول جوندەلىپ، 18 شاقىرىمنان استام تروتۋار سالىندى. كەلەسى جىلى تاعى 84 شاقىرىمعا جۋىق جولدار مەن تروتۋارلار اباتتاندىرىلادى. جىلجىمالى قۇرامدى جاڭارتۋ ءۇشىن 9 باعىت بويىنشا 100 اۆتوبۋس ساتىپ الىندى. اۋدان تۇرعىندارىنىڭ ءوتىنىشى بويىنشا قالداياقوۆ كوشەسىنەن «گەولوگ» باۋ-باقشا سەرىكتەستىگىنە دەيىنگى تاعى ءبىر جاڭا باعىت ىسكە قوسىلادى.
سونداي-اق، قالا اكىمى اۋداننىڭ قوعامدىق قاۋىپسىزدىگىن قامتاماسىز ەتۋ شارالارى تۋرالى حاباردار ەتتى. جول بويىندا جانە قيىلىستاردا 123 «سەرگەك» كامەراسى ورناتىلدى، 2023 جىلدىڭ ءبىرىنشى جارتىسىندا تاعى 58 كامەرا ورناتىلادى. ازاماتتاردىڭ قاۋىپسىزدىگى ءۇشىن اۋداندا 213 بەينەباقىلاۋ كامەراسى جۇمىس ىستەيدى، جەلتوقسان ايىندا ولاردىڭ سانى 355 بىرلىككە جەتكىزىلەدى.
اۋداندا تۇراقتى سۋ باسۋ ورىندارىن جويۋ اياسىندا 7 ۋچاسكە بويىنشا جۇمىستار اياقتالدى. ۇزىندىعى 5 كم ارىق جەلىلەرىنىڭ قۇرىلىسى باستالدى. وسى جوبا شەڭبەرىندە 2023 جىلدىڭ سوڭىنا دەيىن 26 كوشەگە بارلىعى 23،6 كم ارىق جەلىسى سالىنىپ، قايتا جاڭارتىلاتىن بولادى.
وتكەن كەزدەسۋلەردە "كەڭساي" شاعىناۋدانىنىڭ تۇرعىندارى ۇيالى بايلانىس پەن ينتەرنەتتىڭ ساپاسىن جاقسارتۋ ماسەلەسىن كوتەردى. بۇگىنگى تاڭدا KCELL ۇيالى بايلانىس وپەراتورىنىڭ 2 بازالىق ستانسياسى كۇشەيتىلدى. Beeline جانە Tele2 كومپانيالارى جىل سوڭىنا دەيىن 2 ستانسيا ورناتۋدى جوسپارلاپ وتىر. بايلانىس ساپاسىن جاقسارتۋ بويىنشا "مۇزتاۋ" شاعىناۋدانىندا دا جۇمىستار جۇرگىزىلۋدە.
وقۋشى ورىندارىنىڭ تاپشىلىعىن ازايتۋ ءۇشىن 520 وقۋشى ورىنعا ارنالعان قوسالقى نىسانداردىڭ، ەكى مەكتەپ جانە «جانۇيا» مامانداندىرىلعان كەشەن قۇرىلىسىنىڭ جسق ازىرلەنۋدە. №131 مەكتەپتە كۇردەلى جوندەۋ جۇمىستارى جۇرگىزىلۋدە.
مەديسينالىق قىزمەت كورسەتۋدىڭ قادامدىق قولجەتىمدىلىگىن قامتاماسىز ەتۋ ءۇشىن 5 دەنساۋلىق ساقتاۋ وبەكتىسىنىڭ (ونىڭ ىشىندە وتباسىلىق-دارىگەرلىك امبۋلاتوريا، ەمحانا، جەدەل جاردەم قوسالقى ستانسياسى، اۋرۋحانا) قۇرىلىسى بويىنشا جۇمىستار جۇرگىزىلۋدە. 2023-2024 جىلدارعا قالا اكىمدىگى "شىعىس قاقپاسى" پوليسيا ورتالىعىنىڭ اۋماعىندا اۋقىمدى جوبانى ىسكە اسىرۋدى جوسپارلاپ وتىر. بۇل ونكولوگيالىق ورتالىعى بار 250 توسەكتىك كوپسالالى اۋرۋحانانىڭ قۇرىلىسى.
«حالىق قاتىساتىن بيۋدجەت» باعدارلاماسى بويىنشا اۋداندا بيىل 19 جوبا ىسكە اسىرىلدى. ونىڭ ىشىندە اباتتاندىرۋ بويىنشا-11، تەرەڭ كونتەينەرلەرگە ارنالعان الاڭداردى ورناتۋ بويىنشا – 8. كەلەسى جىلى داۋىس بەرۋ قورىتىندىسىنا سايكەس كەلىپ تۇسكەن 170 ۇسىنىستىڭ ىشىنەن 30 جوبا ىرىكتەلدى، ونىڭ ىشىندە اۋلا اۋماقتارىن جوندەۋ – 12، قوعامدىق كەڭىستىكتى اباتتاندىرۋ – 11 جانە تەرەڭدەتىلگەن كونتەينەرلەردى ورناتۋ – 7.
قوعامدىق كەڭىستىكتەردى دامىتۋ اياسىندا كىشى الماتى وزەنىنىڭ تەررەنكۋرداعى سۋ ايدىنىنىڭ جوعارعى بولىگىن مەملەكەت مەنشىگىنە قايتارۋ پروسەدۋراسى جۇرگىزىلۋدە. بالانسقا قابىلدانعاننان كەيىن بوگەتتى نىعايتۋ جانە الماتىلىقتاردىڭ سۇيىكتى ورىندارىنىڭ ءبىرىنىڭ اۋماعىن اباتتاندىرۋ بويىنشا جەكە جوبا ازىرلەنەتىن بولادى.
الماتى اكىمىمەن كەزدەسۋ بارىسىندا تۇرعىندار جولداردى جوندەۋ، كارىز جانە ەلەكتر جەلىلەرىن اباتتاندىرۋ جانە ت.ب. ماسەلەلەرىن كوتەردى.
مەملەكەت باسشىسى قاسىم-جومارت توقايەۆتىڭ جارلىعىمەن بەكىتىلگەن حالىقپەن كەزدەسۋدىڭ جاڭا فورماتىنا سايكەس، جىل سوڭىنا دەيىن ەربولات دوسايەۆ حالىقپەن 24 كەزدەسۋ وتكىزدى – 8 اۋداننىڭ ءارقايسىسىنىڭ تۇرعىندارىمەن توقسانىنا ءبىر كەزدەسۋ.