الماتىدا بيزنەس-قاۋىمداستىق وكىلدەرىنىڭ قالا اكىمى ەربولات دوسايەۆپەن كەزدەسۋى ءوتتى.
كەزدەسۋگە «اتامەكەن» ق ر ۇكپ پرەزيديۋم ءتوراعاسى رايىمبەك باتالوۆ، قالا كاسىپكەرلەرى، سالالىق قاۋىمداستىقتار وكىلدەرى، قۇقىق قورعاۋ جانە قاداعالاۋ ورگاندارىنىڭ وكىلدەرى قاتىستى، دەپ حابارلايدى Almaty-akshamy.kz
بۇگىندە مەگاپوليستىڭ شاعىن جانە ورتا بيزنەسى قالا ەكونوميكاسىنىڭ جارتىسىنا جۋىعىن (47،5%) قۇرايدى جانە قالالىق جۇمىسپەن قامتۋدىڭ 65%-ىن قامتاماسىز ەتەدى. ەربولات دوسايەۆ ءسوزىنىڭ بارىسىندا قالادا ىسكەرلىك احۋالدى جاقسارتۋ جانە شوب-تى بەلسەندى دامىتۋ اكىمدىك جۇمىسىنىڭ باستى باسىمدىقتارىنىڭ ءبىرى بولىپ تابىلاتىنىن اتاپ ءوتتى. «الماتى قالاسىن 2025 جىلعا دەيىن دامىتۋ جانە 2030 جىلعا دەيىنگى ورتا مەرزىمدى پەرسپەكتيۆالار باعدارلاماسىنىڭ» 7 نەگىزگى باعىتىنىڭ ءبىرى ءدال وسى تۇراقتى ەكونوميكالىق ءوسۋ بولىپ تابىلادى.
«الماتىنىڭ بولاشاقتاعى دامۋىنىڭ جەتىستىگى مەن جوسپارلارىمىزدىڭ جۇزەگە اسۋى، ەڭ الدىمەن، ونىڭ ەكونوميكاسىنىڭ تۇراقتى وسۋىمەن، تۇراقتى قارجىلىق تابىستارمەن جانە كاسىپكەرلەرىمىز بەن سىرتقى ينۆەستورلار ءۇشىن جايلى ىسكەرلىك احۋالمەن انىقتالاتىنىنا نىق سەنىمدىمىن»، - دەدى قالا اكىمى.
ەربولات دوسايەۆ قالا اكىمدىگى قالالىق بيزنەس-قوعامداستىقتىڭ ۇسىنىستارى مەن تىلەكتەرىن ەسكەرە وتىرىپ، بيزنەستى جۇرگىزۋ جاعدايلارىن جاقسارتۋ بويىنشا تۇراقتى جۇمىس جۇرگىزىپ جاتقانىن اتاپ ءوتتى. ونلاين-قىزمەتتەردىڭ قولجەتىمدىلىگىن ارتتىرۋ ءۇشىن almatybusiness.gov.kz ۆەب-پورتالى ىسكە اسىرىلدى كاسىپكەرلىكتىڭ سيفرلىق كارتاسىن دامىتۋ جالعاسۋدا، جاڭا نەسيە ونىمدەرى ەنگىزىلدى، پايىزدىق مولشەرلەمە تومەندەدى جانە ت.ب. جالپى شوب دامىتۋ ماقساتىندا اعىمداعى جىلى الماتىدا مەملەكەتتىك جانە قالالىق باعدارلامالار بويىنشا 47،6 ملرد تەڭگە ءبولىندى، 1،3 مىڭنان استام جوبا ماقۇلداندى.
كەزدەسۋگە قاتىسۋشىلار الماتىنىڭ گەواقپاراتتىق كارتاسىن جەتىلدىرۋ، قورشاعان ورتاعا ەميسسياعا رۇقسات بەرۋ، قوعامدىق تاماقتانۋ كاسىپورىندارىن تەكسەرۋ، جەكە ءبىلىم بەرۋ سالاسىن دامىتۋ جانە ت.ب. ماسەلەلەردى كوتەردى، بارلىعى 3 ساعاتقا سوزىلعان كەزدەسۋگە 180-نەن استام بيزنەس وكىلدەرى قاتىستى.
كەزدەسۋ سوڭىندا ەربولات دوسايەۆ كەزدەسۋگە قاتىسقانداردىڭ بارلىعىن الداعى قالا كۇنىمەن قۇتتىقتادى، الماتىنىڭ دامۋىنا قوسقان ۇلەستەرى ءۇشىن بيزنەس-قوعامداستىق وكىلدەرىنە العىسىن ءبىلدىردى جانە وسىنداي شارالاردى تۇراقتى نەگىزدە وتكىزۋ جونىندەگى ۇسىنىستى قولدادى.
