جەتىسۋ اۋدانىنا جاساعان جۇمىس ساپارىن قالا باسشىسى الەۋمەتتىك ينفراقۇرىلىم مەن ينجەنەرلىك جەلىلەردى دامىتۋ ماسەلەلەرى كۇن تارتىبىندە تۇرعان "كەمەل" شاعىناۋدانىنان باستادى، دەپ حابارلايدى اlmaty-akshamy.kz
قازىرگى كەزدە شاعىناۋدان تۇرعىندارىنا ىڭعايلى بولۋ ءۇشىن وتباسىلىق-دارىگەرلىك امبۋلاتوريا سالىنۋدا، ويتكەنى جاقىن ماڭداعى ەمحانا 4 شاقىرىم جەردە ورنالاسقان. مەديسينالىق مەكەمە العاشقى ناۋقاستاردى اعىمداعى جىلدىڭ كۇزىندە قابىلداي باستايدى.
"كەمەل" شاعىناۋدانىنىڭ تۇرعىندارى اۋىز سۋعا قولجەتكىزۋدە ۇنەمى قيىندىقتارعا تاپ بولۋدا. سۋمەن جابدىقتاۋدى ەلەكتر سورعىلارى قامتاماسىز ەتەدى، ەلەكتر قۋاتى اجىراتىلعان كەزدە حالىقتا سۋ بولمايدى. بۇل پروبلەمالار وبلىستىڭ قالامەن شەكارالارى وزگەرگەن كەزدە «مۇرا» رەتىندە قالعان. «شەتسىز قالا» باعدارلاماسىن ىسكە اسىرۋ اياسىندا وسى ماسەلەلەردى شەشۋ ءۇشىن ينجەنەرلىك جەلىلەردىڭ ەكى جوباسى (ەلەكترمەن جابدىقتاۋ جانە سۋدان بۇرۋمەن سۋمەن جابدىقتاۋ) ازىرلەندى. قۇرىلىس-مونتاج جۇمىستارى 2022 جىلدىڭ ەكىنشى توقسانىنا جوسپارلانعان. قالا باسشىسى اۋدان اكىمىنە وسى جوبالاردىڭ ىسكە اسىرىلۋىن ەرەكشە باقىلاۋدا ۇستاۋدى تاپسىردى.
شاعىناۋدان تۇرعىندارىنىڭ دەمالۋىنا جايلى جاعداي جاساۋ ماقساتىندا 10 مىڭ ادامدى قامتيتىن دەمالىس جانە بەلسەندى دەمالىس ايماقتارىن اباتتاندىرۋ بويىنشا جوبا قاراستىرىلۋدا. "كەمەل" شاعىناۋدانىندا جاعالاۋ ايماعىن سالۋ جوباسى 2020 جىلى ازىرلەندى. نىساننىڭ قۇرىلىسى ءۇشىن رەسپۋبليكالىق بيۋدجەتتەن 789،8 ملن تەڭگە سوماسىندا قارجىلاندىرۋ سۇرالدى.
اۋداندى ارالاۋ بارىسىندا الماتى اكىمى قارت ادامدار يوگامەن، حورەوگرافيامەن، ايكۋنمەن، سكانديناۆيالىق ەڭبەك تەراپياسىمەن اينالىساتىن، اعىلشىن جانە قازاق تىلدەرىن وقىتاتىن (اي سايىن 70-80 ادام بارادى) مادەنيەت ءۇيىنىڭ جۇمىسىمەن تانىستى، سونداي-اق تۇرعىندارمەن كەزدەستى، ولاردىڭ وتىنىشتەرى مەن ۇسىنىستارىن تىڭدادى. وزەكتى تاقىرىپتاردىڭ قاتارىندا قوعامدىق كولىك ايالدامالارىن ۇيىمداستىرۋ، اۆتوبۋس باعىتتارىن وزگەرتۋ جانە ت.ب. ماسەلەلەر كوتەرىلدى. كەزدەسۋ قورىتىندىسى بويىنشا قالا باسشىسى قالالىق موبيلدىلىك باسقارماسىنا قوعامدىق كولىك قوزعالىسىنا ساراپتاما جۇرگىزۋدى جانە تۇرعىنداردىڭ ماسەلەلەرىن قاراۋ ءۇشىن ءتيىستى شارالار قابىلداۋدى تاپسىردى.
قالا اكىمى دۋلىعا كوشەسىندەگى اپاتتى جاعدايداعى ۇيلەردىڭ تۇرعىندارىمەن دە كەزدەستى. ءتيىستى شارالار قابىلداۋ ءۇشىن ماسەلە باقىلاۋعا الىندى.
جاقىن ارادا "كەمەل" مەن "كوكجيەك" شاعىناۋدانىنىڭ بالالارى جايساڭ كوشەسىندە ورنالاسقان دەنە شىنىقتىرۋ-ساۋىقتىرۋ كەشەنىنىڭ سەكسيالارىنا تەگىن بارا الادى. ونىڭ قۇرىلىسىن وسى جىلدىڭ 1 توقسانىنىڭ سوڭىنا دەيىن اياقتاۋ جوسپارلانۋدا.
"كوكجيەك" شاعىناۋدانىندا قالا اكىمىنە جاڭا قاراعاي ورمانىنىڭ اۋماعى كورسەتىلدى. «تازا قازاقستان» ەكولوگيالىق جوباسىن ىسكە اسىرۋ اياسىندا 3،1 گەكتار جەرگە 1 500-دەن استام قاراعاي مەن 11 مىڭنان استام جاپىراقتى اعاش وتىرعىزىلدى. 65 مەتر تەرەڭدىكتە سورعىنى ورناتۋ بويىنشا جۇمىستار جۇرگىزىلدى، 25 تەكشە مەتر سۋعا قاتىستى 2 رەزەرۆۋار ورناتىلدى. قازىرگى كەزدە اعاش كوشەتتەرىن تامشىلاتىپ سۋارۋ تەتىكتەرىن ورناتۋ جۇمىستارى جۇرگىزىلۋدە. قالا باسشىسى اعىمداعى جىلدىڭ سۋارۋ ماۋسىمىنا بايلانىستى جاسىل ەكونوميكا باسقارماسى جۇمىستاردى اياقتاۋى ءتيىس ەكەنىن اتاپ ءوتتى.
اۋداندى ارالاۋ بارىسىندا ە.دوسايەۆ "كوكجيەك" شاعىناۋدانىنداعى №177 مەكتەپكە باردى. وقۋ مەكەمەسى قوسىمشا قۇرىلىس سالۋ ەسەبىنەن 600 ورىنعا كەڭەيتىلدى، بۇل ورىن تاپشىلىعى ماسەلەسىن شەشۋگە ىقپال ەتتى.
قالا اكىمىمەن كەزدەسۋ بارىسىندا جۇمىسشى كەنتىنىڭ تۇرعىندارى مەديسينالىق قىزمەتتەرگە قولجەتىمدىلىك پروبلەماسى جونىندە ايتىپ بەردى. تۇرعىندار باسقا اۋدانداردىڭ ەمحانالارىنا بارۋعا ءماجبۇر. ە. دوسايەۆ اۋدان اكىمىنە جاڭا ەمحانا سالۋ ءۇشىن قولايلى جەر ۋچاسكەسىن ىزدەۋ بويىنشا شارالار قابىلداۋدى تاپسىردى.
جۇمىس ساپارىنىڭ سوڭىندا قالا اكىمى 2021-2025 جىلدارعا ارنالعان تۇرعىن ءۇي قورىن جاڭارتۋ باعدارلاماسى اياسىندا كرىلوۆ، سكريابين، گونچاروۆ كوشەلەرى مەن رايىمبەك داڭعىلىنىڭ كۆادراتىندا سالىنىپ جاتقان ۇيلەردىڭ قۇرىلىس بارىسىمەن تانىستى. قازىرگى كەزدە قۇرىلىس-مونتاج جۇمىستارى جۇرگىزىلۋدە، 30 ەسكى ەكى قاباتتى ءۇيدى ءسۇرۋ جۇزەگە اسىرىلۋدا. ولاردىڭ ورنىندا 2024 جىلعا دەيىن 24 كوپ پاتەرلى ءۇي (بۇزىلعان 11 ءۇيدىڭ ورنىندا 9 ءۇي اعىمداعى جىلدىڭ سوڭىنا دەيىن تاپسىرىلادى) سالىنادى.
ارالاۋ قورىتىندىسى بويىنشا قالا باسشىسى جەتىسۋ اۋدانىنىڭ اكىمى گ.كوكەبايەۆانىڭ جۇمىسىن ماقۇلدادى جانە «شەتسىز قالا» باعدارلاماسى اياسىندا اۋداندى ودان ءارى دامىتۋدى جالعاستىرۋدى تاپسىردى.