اكىمدىكتە الماتى اكىمى دارحان ساتىبالدى مەن شانحاي قالاسى اكىمىنىڭ ورىنباسارى، قوعامدىق قاۋىپسىزدىك باسقارماسىنىڭ باسشىسى چجان يا حۋن اراسىندا رەسمي كەزدەسۋ ءوتتى.
كەلىسسوز بارىسىندا تاراپتار ەكونوميكا، ينۆەستيسيا، تۋريزم، سيفرلىق تەحنولوگيالار جانە قوعامدىق قاۋىپسىزدىك سالالارىنداعى ىنتىماقتاستىقتى كەڭەيتۋ ماسەلەلەرىن تالقىلادى.
دارحان ساتىبالدى جۇڭگو الماتىنىڭ نەگىزگى ساۋدا-ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. بۇگىندە قالادا جۇڭگو كاپيتالى بار 2،9 مىڭنان استام كاسىپورىن جۇمىس ىستەيدى. قىتايمەن تاۋار اينالىمى مەگاپوليستىڭ سىرتقى ساۋداسىنىڭ ۇشتەن بىرىنە تەڭ. 2025 جىلدىڭ قاڭتار–شىلدە ايلارىندا ءوزارا ساۋدا كولەمى 5 ملرد اقش دوللارىنا جەتىپ، وتكەن جىلمەن سالىستىرعاندا 17%-عا ءوستى.
اسىرەسە، قاۋىپسىزدىك سالاسىنداعى تاجىريبە الماسۋ ماسەلەسىنە ەرەكشە كوڭىل ءبولىندى. اكىم الماتىنىڭ قوعامدىق قاۋىپسىزدىكتى ارتتىرۋ ءۇشىن شانحايدىڭ زاماناۋي تەحنولوگيالار مەن جاساندى ينتەللەكتتى قولدانۋداعى تاجىريبەسىنە قىزىعۋشىلىق تانىتتى.
«شانحاي – الەمدەگى ەڭ ءقاۋىپسىز قالالاردىڭ ءبىرى. ءبىز سيفرلىق شەشىمدەردى ەنگىزۋ جانە يننوۆاسيالاردى پايدالانۋ بويىنشا تاجىريبە الماسۋعا مۇددەلىمىز»، – دەدى دارحان ساتىبالدى.
كەزدەسۋدە تۋريزم مەن الماتىنىڭ تاۋ كلاستەرىن دامىتۋ، مادەني بايلانىستار جانە كرەاتيۆتى يندۋسترياداعى بىرلەسكەن باستامالار دا ءسوز بولدى. اتاپ ايتقاندا، الماتى–شانحاي، الماتى–گۋانچجوۋ جانە الماتى–ينين باعىتتارىندا اشىلعان تىكەلەي اۋە رەيستەرىنىڭ ماڭىزى ايتىلدى. سونداي-اق، ۆەنچۋرلىق قورلار مەن كومپانيالاردى ورتاق جوبالارعا تارتۋ مۇمكىندىگى تالقىلاندى.
ءوز كەزەگىندە چجان يا حۋن ەكىجاقتى بايلانىستاردى نىعايتۋعا دايىن ەكەنىن جەتكىزىپ، ساۋدا-ەكونوميكالىق، مادەني جانە گۋمانيتارلىق سالاداعى سەرىكتەستىكتىڭ جوعارى الەۋەتىن اتاپ ءوتتى.
كەزدەسۋ قورىتىندىسىندا تاراپتار ىنتىماقتاستىقتى جالعاستىرىپ، الماتى دەلەگاسياسىنىڭ قاراشا ايىندا شانحايعا رەسمي ساپارىن وتكىزۋگە ۋاعدالاستى.