الماتى اكىمى دارحان ساتىبالدى قالاداعى جول جوندەۋ جۇمىستارىن كۇزگە دەيىن اياقتاۋدى تاپسىردى، دەپ حابارلايدى aqshamnews.kz ءتىلشىسى.
"مىندەتتەمەسىنە سالعىرت قاراپ، ۋاقىتىندا ورىندامايتىن مەردىگەرلەرمەن كەلىسىمشارتتى بۇزىپ، جاۋاپسىز كومپانيالار تىزىمىنە ەنگىزۋ قاجەت"، – دەدى دارحان ساتىبالدى ناۋرىزباي اۋدانىنداعى جۇمىس ساپارى بارىسىندا.
ناۋرىزباي اۋدانىنا جۇمىس ساپارى اياسىندا الماتى اكىمى دارحان ساتىبالدى الەۋمەتتىك جانە ينفراقۇرىلىمدىق جوبالاردى جۇزەگە اسىرۋ بارىسىمەن تانىستى.
قۇرامىس شاعىناۋدانىندا قالا باسشىسى الەۋمەتتىك ينفراقۇرىلىم نىساندارىنىڭ قۇرىلىس بارىسىن قاراپ شىقتى. اتاپ ايتقاندا، 2023 جىلى تامىزدا قالا اكىمدىگى جانىنداعى جوبالىق كەڭسەنىڭ قولداۋىمەن قۇرىلىسى باستالعان 1500 ورىندىق جايلى مەكتەپ سالىنىپ جاتىر. اۋدان حالقىنىڭ كوبەيۋىنە جانە تۇرعىن ءۇي قۇرىلىسىنىڭ جاپپاي سالىنۋىنا بايلانىستى مەكتەپ تاپشىلىعى ماسەلەسى ءالى دە وزەكتى. 2024-2025 وقۋ جىلىندا شامامەن 5 مىڭ وقۋشىعا ورىن قاجەت.
سونداي-اق، سول ماڭدا 320 بالاعا ارنالعان بالاباقشا سالىنىپ جاتىر. قازىرگى ۋاقىتتا نىسان 65% دايىن.
قۇرىلىس مەرزىمى سوزىلىپ كەتكەنىن كورگەن قالا باسشىسى مەردىگەر كومپانياعا قاتىستى سىن ايتتى. قۇرىلىس باسقارماسىنا باقىلاۋدى كۇشەيتۋدى، ال مىندەتتەمەسىن ۋاقىتىندا ورىنداماعان كومپانيالاردى جۇمىستان شىعارىپ، جاۋاپسىز مەردىگەرلەر تىزىمىنە ەنگىزۋدى تاپسىردى.
"بۇلاي بولمايدى! ەگەر جۇمىس مەرزىمىنەن كەشىگىپ جاتسا، ءتيىستى شەشىمدى وزدەرىڭىز قابىلداپ، كەلىسىمدى بۇزىپ، كومپانيانى قارا تىزىمگە ەنگىزىڭىزدەر. مەنى ەرتىپ كەلىپ، شەشىمى جوق ماسەلە دەپ ايتۋدىڭ قاجەتى جوق. ەشكىم سىزدەرگە جۇمىس ىستەۋگە كەدەرگى جاساپ وتىرعان جوق. ءار نىسانعا ءجىتى باقىلاۋ كەرەك"، – دەدى شاھار باسشىسى.
دارحان ساتىبالدىعا بيىل ناۋرىزدا قۇرىلىسى باستالعان اۋىسىمىنا 500 قابىلداۋعا ارنالعان ەمحانانىڭ دا بارىسى تۋرالى باياندالدى. قۇرىلىس اياقتالعاننان كەيىن بۇل نىسان شامامەن 30 مىڭ تۇرعىنعا قىزمەت كورسەتپەك. جاڭا مەديسينالىق نىسان 26-قالالىق ەمحانانىڭ جۇكتەمەسىن جەڭىلدەتىپ، شاعىناۋدان تۇرعىندارىنا قولجەتىمدى مەديسينالىق كومەك كورسەتۋگە مۇمكىندىك بەرەدى.
دارحان ساتىبالدى قۇرىلىسقا بايلانىستى ۋاقىتشا جابىلاتىن جول جوندەۋ جۇمىستارىن رەتكە كەلتىرۋدى تاپسىردى.
"جوبا بار. ينجەنەرلىك جەلىلەر تارتىلىپ جاتىر. قارجىدان قيىندىق جوق. ەندى تەك جۇمىستى ۋاقىتىندا ءارى ساپالى اتقارۋ كەرەك. جاز مەزگىلىندە جول قازۋ جۇمىستارىنىڭ ءبارىن جاڭا وقۋ جىلى باستالعانعا دەيىن اياقتاۋ قاجەت"، – دەدى الماتى اكىمى.
بۇدان كەيىن دارحان ساتىبالدى اقجار شاعىناۋدانىنا بارىپ، سۋ جانە كارىز جۇيەلەرىنىڭ قۇرىلىسىنىڭ ەكىنشى كەزەڭىن قاراپ شىقتى. جوبا اياسىندا ۇزىندىعى 82،4 شاقىرىم بولاتىن ينجەنەرلىك جەلىلەر جۇرگىزىلەدى. ءقازىردىڭ وزىندە 31 كم سۋ قۇبىرى مەن 27 كم كارىز جەلىلەرى سالىنىپ ءبىتتى. قۇرىلىس پەن ىسكە قوسۋ جۇمىستارى 2025 جىلدىڭ جەلتوقسانىندا اياقتالادى دەپ جوسپارلانعان. جوبا تولىعىمەن جۇزەگە اسقاندا، 33 مىڭنان استام اقجاردىڭ تۇرعىن ساپالى اۋىزسۋمەن قامتىلادى.
كەلەسى نىسان – اباي داڭعىلىنىڭ مومىش ۇلى كوشەسىنەن قالا شەكاراسىنا دەيىن سوزىلاتىن جول قۇرىلىسى. جالپى ۇزىندىعى 5،3 شاقىرىم بولاتىن جولدىڭ 4،7 كم بولىگى اياقتالىپ، پايدالانۋعا بەرىلگەن. بيىل 30 مامىردا قۇرىلىسشى كوشەسىنەن التىن وردا كوشەسىنە دەيىنگى 600 مەترلىك ۋچاسكەدە كولىك قوزعالىسى اشىلدى. ءقازىر اسفالت توسەۋ، تروتۋارلار مەن ىشكى جولداردى سالۋ جۇمىستارى ءجۇرىپ جاتىر. جوبا 2025 جىلدىڭ قاراشاسىنا دەيىن اياقتالۋعا ءتيىس. ال ورتاشا جوندەۋ جۇمىستارى بيىلعى قازان ايىنىڭ سوڭىنا دەيىن بىتەدى دەپ جوسپارلانىپ وتىر.
سونىمەن قاتار، اكىم №7 قالالىق كلينيكالىق اۋرۋحاناعا دا بارىپ، ەمحانانىڭ كۇردەلى جوندەۋ جۇمىستارىمەن تانىستى. بۇل عيمارات 15 جىلدان بەرى جوندەۋ كورمەگەن. ينجەنەرلىك جۇيەلەر، شاتىر جانە جۇك جەدەلساتىلارى ابدەن توزعان.
ساپار سوڭىندا دارحان ساتىبالدى اۋدان اكىمىنە بارلىق نىسانداعى جۇمىستىڭ ساپاسى مەن مەرزىمىنىڭ ساقتالۋىن قاتاڭ باقىلاۋعا الۋدى جۇكتەدى.
سۋرەتتەر: الماتى قالاسى اكىمىنىڭ باسپاسوزىنەن