الماتى قالاسىنىڭ اكىمى دارحان ساتىبالدى اۋەزوۆ اۋدانىنداعى جاستار كوميۋنيتي-ورتالىعىنا بارىپ، جاستارمەن ەمەن-جارقىن كەزدەسۋ وتكىزدى، دەپ حابارلايدى aqshamnews.kz
جۇزدەسۋدىڭ نەگىزگى وزەگى جۇمىس تابۋ، كاسىبي دامۋ، قالالىق جانە ەكولوگيالىق باستامالارعا قاتىسۋ ماسەلەلەرى بولدى.
اشىق ديالوگ بارىسىندا بەلسەندى جاستار تىڭ يدەيالارىن ءبولىستى، ويعا العان جوبالارى تۋرالى ايتىپ، جاستاردى قولداۋدىڭ جاڭا فورماتتارىن ۇسىندى. ولار سۇرانىسقا يە ماماندىقتار بويىنشا قىسقا مەرزىمدى وفلاين-كۋرستاردى ىسكە قوسۋ، «تازا قازاقستان» ەكولوگيالىق اكسياسىنا قاتىسۋ، جاس مۇعالىمدەر مەن دارىگەرلەردى ۋاقىت تالابىنا ساي وزەكتى soft skills-كە وقىتۋ سىندى ماسەلەلەردى كوتەردى.
كەزدەسۋ بارىسىندا الداعى 12 تامىزدا اتاپ وتىلەتىن حالىقارالىق جاستار كۇنىنە دايىندىققا ەرەكشە نازار اۋدارىلدى. الماتىدا جاستاردى الەۋمەتتىك ماڭىزى بار قىزمەتكە تارتۋعا، ولاردىڭ كوشباسشىلىق قاسيەتتەرىن دامىتۋعا جانە بەلسەندى ازاماتتىق ۇستانىمىن قالىپتاستىرۋعا باعىتتالعان ءبىرقاتار ءىس-شارا جوسپارلانۋدا.
شاھار باسشىسى جاستاردىڭ ءوز كوزقاراسىن، ازاماتتىق ۇستانىمىن ەركىن تانىتۋعا جانە ولاردىڭ قالانىڭ دامۋىنا ءوز ۇلەسىن قوسۋىنا قولايلى جاعداي جاساۋعا مۇمكىندىك بەرەتىن «جاستار قاتىساتىن بيۋدجەت» تەتىگىن ازىرلەۋدى تاپسىردى.
«بۇگىندە الماتىدا 700 مىڭنان استام جاس تۇرادى. ولاردىڭ ءارقايسىسىنىڭ ساپالى بىلىمگە، كاسىبي جانە شىعارماشىلىق دامۋىنا قول جەتكىزۋىن قامتاماسىز ەتۋ، ولاردىڭ الەۋەتىن ىسكە اسىرۋ – ءبىزدىڭ ورتاق مىندەتىمىز»، – دەپ اتاپ ءوتتى الماتى اكىمى دارحان ساتىبالدى.
قالا باسشىسى كەزدەسۋدە ايتىلعان بارلىق ۇسىنىس مۇقيات قارالىپ، زەردەلەنىپ، مۇمكىندىگىنشە ىسكە اسىرىلاتىنىن اتاپ ءوتتى. جاستاردىڭ دامۋى ءۇشىن جاعداي جاساۋ – قالا ساياساتىنىڭ باسىم باعىتتارىنىڭ ءبىرى.
بۇگىنگى كۇنى قالادا 11 كوميۋنيتي-ورتالىق جۇمىس ىستەيدى. وندا جاستار پسيحولوگيالىق جانە زاڭ كومەگىنەن باستاپ، كاسىپتىك باعدار الۋعا، تىلدىك كۋرستار مەن مەملەكەتتىك باعدارلامالار بويىنشا كونسۋلتاسيالارعا دەيىن تەگىن قىزمەت الادى. اتالعان قاۋىمداستىقتار قالانىڭ جاس تۇرعىندارىنىڭ مۇمكىندىگىن، دارىنىن اشۋعا، كەز-كەلگەن باستامالارىن قولداۋعا دايىن، ەسىگى ءارقاشان اشىق زاماناۋي ورتالىققا اينالىپ كەلەدى.