بولاشاقتا اۋداندا ەمحانالار سانى ارتادى.
جىل سوڭىنا دەيىن الماتىنىڭ بوستاندىق اۋدانىندا «بالالارعا شۇعىل مەديسينالىق كومەك كورسەتۋ ورتالىعىنىڭ» جاڭا كورپۋسىنىڭ قۇرىلىسى اياقتالادى. بۇل تۋرالى قالا اكىمى ەربولات دوسايەۆ اۋدان تۇرعىندارىمەن بولعان كەزدەسۋ بارىسىندا ايتتى، دەپ حابارلايدى Almaty-akshamy.kz.
اكىمنىڭ ايتۋىنشا، «بالالارعا شۇعىل مەديسينالىق كومەك كورسەتۋ ورتالىعىنىڭ» ءتورت قاباتتى جاڭا كورپۋسىن زاماناۋي قابىلداۋ بولمەسى، رەانيماسيا، وپەراسيالىق جانە نەيروحيرۋرگيا بولىمشەسى مەن تولىق جابدىقتالعان زەرتحانا بولادى.
قالا اكىمى ەربولات دوسايەۆ الماتىنىڭ بوستاندىق اۋدانىنىڭ تۇرعىندارىنا اۋدانداعى مەديسينالىق-سانيتارلىق كومەكتى قالاي دامىتاتىنىن ايتتى.
ونىڭ سوزىنە جۇگىنسەك، اتالمىش اۋداندا 7 جەكە مەنشىك ەمحانا بار، وندا 53،5 مىڭ تۇرعىن تىركەلگەن (ءاربىر جەكە مەنشىك ەمحاناعا 2-دەن 10 مىڭ ادامعا دەيىن). ءال-فارابي داڭعىلىنىڭ وڭتۇستىگىنە قاراي 2 وتباسىلىق-دارىگەرلىك امبۋلاتوريا ورنالاسقان، ولار 26 مىڭ ادامعا قىزمەت كورسەتەدى. سوندىقتان، بارلىق جۇكتەمە مەملەكەتتىك ەمحانالارعا تۇسەدى.
«ءال-فارابي داڭعىلىنان جوعارى تۇراتىن حالىققا ساپالى مەديسينالىق قىزمەت كورسەتۋ ءۇشىن ءبىز 500 كەلۋشىگە ارنالعان ەمحانا قۇرىلىسىنا جەكە مەنشىكتەن جەر ۋچاسكەسىن ساتىپ الۋ ءۇشىن كەلىسسوزدەر جۇرگىزىپ جاتىرمىز. 15 مامىرعا دەيىن ەمحانا سالىناتىن جەردى انىقتايمىز جانە جىلدىڭ سوڭىنا دەيىن جوبالاۋ-سمەتالىق قۇجاتتامانى ازىرلەۋدى اياقتاۋدى جوسپارلاپ وتىرمىز»، - دەدى قالا اكىمى.
اۋدانداعى 3 مەملەكەتتىك ەمحانادا ورىن جوق، بۇل قىزمەت كورسەتۋ ساپاسىنا، كەزەكتىلىككە كەرى اسەر ەتەدى.
انىقتاما ءۇشىن: №4 ەمحانادا ەسەپتە تۇرعاندار سانى - 88 860، № 12 ەمحانادا - 63 545، № 17 ەمحانادا – 83 301. 7 ەمحانادا – 53 200.
جالپى، بوستاندىق اۋدانىنىڭ تۇرعىندارىنا مەملەكەتتىك تاپسىرىس بويىنشا جۇمىس ىستەيتىن 28 مەديسينالىق ۇيىم قىزمەت كورسەتەدى. قالا قاراماعىندا 10 ستاسيونار جانە 4 ەمحانا بار، ولارعا 286 مىڭ حالىق تىركەلگەن.