الماتى قالاسى اكىمدىگىندە قالا اكىمى دارحان ساتىبالدىنىڭ توراعالىعىمەن ازاماتتاردى جەكە قابىلداۋ ءوتتى، دەپ حابارلايدى aqshamnews.kz
كەزدەسۋ بارىسىندا تۇرعىندار باسپانا، كوممۋنالدىق ينفراقۇرىلىم، كولىك قاتىناسى، جەر قاتىناستارى، دەنساۋلىق ساقتاۋ جانە قۇرىلىس سالاسىنداعى زاڭدىلىق ماسەلەلەر كوتەردى.
اسىرەسە الەۋمەتتىك وسال توپتار – زەينەتكەرلەر، جالعىزباستى انالار مەن بيۋدجەتتىك سالا قىزمەتكەرلەرىنىڭ وتىنىشتەرىنە ەرەكشە نازار اۋدارىلدى. تۇرعىن ءۇي ءبولۋ جانە «وتباسى بانك» ەلەكتروندى پلاتفورماسى ارقىلى كەزەككە قويۋ جۇيەسىن جەتىلدىرۋ ماسەلەلەرى تالقىلاندى.
سونىمەن قاتار ەلەكتر ەنەرگياسىنىڭ تۇراقسىز بەرىلۋى مەن كوممۋنالدىق قىزمەتتەردىڭ ساپاسىنا قاتىستى وتىنىشتەر قارالدى. اكىمنىڭ تاپسىرماسىمەن ءتيىستى باسقارمالار مەن ەنەرگەتيكالىق كومپانيالار ەلەكتر جەلىلەرىن قالا مەنشىگىنە تەزىرەك قابىلداپ، ۇزدىكسىز ەلەكترمەن قامتۋدى قامتاماسىز ەتۋ باعىتىندا شارالار قابىلدايدى.
الاتاۋ جانە مەدەۋ اۋدانىنداعى قۇرىلىس نىساندارىنىڭ زاڭدىلىعىن تەكسەرۋ بويىنشا تاپسىرما بەرىلدى. سونداي-اق قالالىق موبيلدىلىك باسقارماسىنا كولىك قاتىناسىن جانە جول قوزعالىسى قاۋىپسىزدىگىن جاقسارتۋ بويىنشا ۇسىنىستاردى قاراۋ تاپسىرىلدى.
بۇدان بولەك، شاعىن بيزنەسكە ارنالعان جەر تەلىمدەرىن ءبولۋ جانە تۇرعىنداردى قاجەتتى دارى-دارمەكپەن قامتاماسىز ەتۋ ماسەلەلەرى دە تالقىلاندى.
«ءار ءوتىنىشتىڭ ارتىندا ناقتى ادام مەن ونىڭ ومىرلىك جاعدايى تۇر. سوندىقتان بارلىق ماسەلە جەكە باقىلاۋىما الىندى»، – دەدى قالا اكىمى دارحان ساتىبالدى.
ايتا كەتەيىك، ازاماتتاردى جەكە قابىلداۋ تۇراقتى تۇردە وتكىزىلىپ كەلەدى. ونىڭ ماقساتى – حالىق پەن اتقارۋشى بيلىك اراسىنداعى اشىق ديالوگتى قامتاماسىز ەتۋ. سونىمەن قاتار قالا اكىمى كۇن سايىن اۋداندارعا شىعىپ، تۇرعىندارمەن كەزدەسىپ، بەرىلگەن تاپسىرمالاردىڭ ورىندالۋىن ءوز باقىلاۋىندا ۇستايدى.